Şirnex, Amed û Îstanbul de çarçewa Roşanê Ziwanê Kurdkî de aktîvîteyî ameyî kerdene û mesajê ‘‘Ma meverdê ke ala kurdkî binê lingê îşxalkeran de bimana’’ ame dayene.

Şirnex de CÛDÎ-DER, MED-DER û Kurdî-Gehî pîya konvoy, şayî û rayraşîyayîş kerd. Hêverî şayîye ameye viraştene. Şayîye de şarî govende girewte. Dima şarî konvoye viraşte û eşkerayîye daye. Eşkerayîye de ame vatebe ke wayîrvejîyayîşê ziwanî erkê pêro kurdan o.

Amed de MED-DERî Şaredarîya Pîranî de aktîvîte kerde, dersa kurdkî daye û domanan deyîrî vatî.

Îstanbul de qezaya Kadikoyî de, Parka Yogurtçuyî de MKM, Komeleya Cigêrayîşanê Kurdkî û Dibistana Muzîkî ya Egîdê Cîmoyî şayîyêke viraşte. Bername de atolyaya domanan ameye kerdene. Wekîla DEM Partî ya Mûşî Sumeyye Boz vat ke ê seba ke kurdkî biba wayîra statuyê fermîyî têkoşîn bikerê. Şayîye de hunermendî Erdogan Emîr, Evîne Sindî, koma Vejîn, Koma Vora, Koma Mezra Botan, Sîya Şevê û Koma Avna vejîyayî sehne ser.