12ê gulana 2021î de Konya de vera ferdanê keyeyê kurdî Dedeogullariyî keyeyanê faşîstan Çalik û Keleşî hêriş kerdbi. Roniştişê dewaya qirkerdişî Mehkemeya Cezaya Girane Konya de dest pêkerd ke tede 9 kesî yenê muhakemekerdene.

Çetîn Dedeogullariyo ke keyeyê ci ra têna o mendo, merdimê keyeyî, Hetkarê Hemserekanê HDPyî Umît Dede, Wekîlê HDPyî Murat Çepnî, Huda Kaya, Zeynel Ozen û îdarekarê partîye zî tede xeylêk avûkatî tewrê roniştişî bîyî. Polîsan salone girewtbî binê ablûqa.

Alî Keleş û Lutfî Keleş pê rayîrê SEGBÎSî tewrê roniştişî bîyî. Alî Çalik, Alî Keleş, Ayşe Keleş, Îbrahîm Keleş, Ramazan Çalik, Velî Keleş û Yahya Çalik salone de bîyî.

Alî Keleşî roniştiş de Bariş Dedeogullariyo ke qetil bîyo sûcdar kerd. La eşkera bi ke Keleşî asayîş de îfadeyêko cîya dabi. Lutfî Keleşî zî îdîa kerd ke serebût rayîr de qewimîyayo. Ayşe Keleş zî eqsê îfadeyê xo yê verênî îdîa kerd ke Yaşar Dedeogullariyî verî çeka xo veta. Yahya Çalikî zî îdîa kerd ke wexto ke verê berî ra vîyartêne ey serebût dîyo.

Merdimanê Keyeyê Dedeogullariyî vat: ''Zûran meke.'' Polîsan xîret kerd ke mudaxeleyê keyeyî bikerê. Merdimanê Dedeogullariyî vat: ''Şima înan asteng nêkenê, ma kenê.'' Polîsan naye ser o hêrişê keyeyî kerd. Polîsan merdimê Dedeogullariyî erdî ra derg kerdî.

Wextê hêrişî de heyetî salone teriknaye. Polîsan hêrişî rê dewam kerd, salone kerde veng. Seba dewamkerdişê roniştişî qerarê heyetî pawîyeno.