Faşîstê bi nameyê Onur Gencero ke dewleta tirke paştî dayêne ci bînaya HDPyî ya Îzmîrî de Denîze Poyraz qetil kerdbî. Roniştişo dewaya vera kiştox Gencerî Mehkemeya Cezaya Girane ya Îzmîrî de ame kerdene. Keyeyê Denîze Poyraz, Vervatoxa HDPyî Ebru Gunay, wekîlê HDPyî Mûrat Çepnî, Oya Ersoy, Serpîl Kemalbay, Wekîlê CHPyî Sezgîn Tanrikulu û Serekê Weqfa Haştîye Hakan Tahmaz zî tewrê roniştişî bîyî.

Roniştiş de 20 deqa mabên dîya û mabênî ra dima heyetê mehkeme reyna ame salone. Hemserekê HDPyî yê Îzmîrî Çinar Altanî vera mehkeme nêrazîbîyayîşê xo mojna û salone ra ame vetene.

Dima dozgerî heqê qiseykerdişî girewt û waşt le seba goşdarîkerdişê şahidî roniştiş bêro taloqkerdene.

Serekê Baroyê Îzmîrî derheqê wekîlanê beşdaran de qisey kerd û vat: ''Ma wazenê wa şahidî bêrê goşdarîkerdene. Tedbîrê asayîşî nêameyî girewtene. Mabênê avûkat û cendirmeyan de alozîye vejîyaye. Cendirmeyan da beşdaran ro, alozîye wina dest pêkerde. Ma wazenê ke nasnameyê nê kesan bêrê tesbîtkerdene û dozgerîye rê bêrê şawitene.''

Kiştox Gencerî vat: ''Ez wazena dosyaya dewaya qefilnayîşê HDPyî wa îlaweya dosyaya mi bêra kerdene. Çunke serebût no yo.''

Heyetê mehkeme zî bira xo eşkera kerde û vat ke alozîye ra dewa hînî Salona Zîndanê Şakranî ya Alîagayî de bêra dîyene û roniştiş taloqê sibayî saete 10.00 kerd.

Cinîyan seba Denîze pankarte akerde

Hetê bînî ra wextê roniştişî de endamanê 'Cinîyî Pîya Bihêz ê(KGB)' bînaya Edlîyeya Bayrakliyî de pankarta 'Kiştoxê Denîze Poyraz 5 roniştişî yo pawîyenê' daliqnaye. Polîsan waşt ke hêrişê cinîyan bikerê la şarî vera ney nêrazîbîyayîşê xo mojna. Cinîyan a hele tim sloganê 'Denîze Poyraz serewedaritişê ma ya' vat.