Dewaya sîyasetmedarê krudî Kenan Ayazî yo ke bi waştişê Almanya Kibris de ame tepiştene û Almanya rê ame îadekerdene, vizêr Hamburg de dest pêkerde. Verê Mehkemeya Eyaletî ya Hamburgî de semedê Ayazî çalakîya paştdayîşî ameye kerdene.

Kanan Ayazo ke aşma hezîrane ra Zîndanê Damtorî  yê Hamburgî de yeno tepiştene derheqê ci de madeyê 129byî yê Qanûnê Ceza ya Almanî ra dewa ameye akerdene. Vizêr Mehkemeya Eyaletî ya Hamburgî de roniştişo verên yê dewa ame vînayene. Kenan Ayazî kesê ke tewrê mehkeme bîyî bi nîşanê serkewtişî selam kerdî.

Mutalaya dozgerîye de Kenan Ayaz  yeno sûcdarkerdene ke serranê 2018-2019î de Hamburg û dormeyê ci de falîyetê sîyasîyî kerdî û yeno waştene ke goreyê madeyê 129byî bêro cezakerdene. Avûkatê Ayazî Antonia Von Der Behrensî vist vîrî ke muwekîlê ci dewaya KCKyî ra Tirkîya de 13 serrî zîndan de mendo û vat, “Kenan Ayaz çirey tewrê şîdetî nêbiyo. Rîyê menfeatê ekonomîkî yê mabênê Almanya û Tirkîya yeno muhakemekerdene. Na dewaya huqûqî nîya û ganî cade bêro qefilnayene.” 

Gama ke roniştişî dewam kerdêne verê mehkeme de hetê Înîsîyatîfê Kenan Ayazî ra çalakîya paştdayîşî ameye kerdene. Wekîlê AKELî yê Kibrisî Giorgos Koukoumas zî tewrê çalakîye bi û vat, “Rixmo ke Kenan Ayaz tewrê serebûtanê şîdetî nêbîyo sey  ‘terorîstî’ yeno name kerdene ke no nîno qebulkerdene. Ma nê tewirê Almanya şermezar kenê.  Ma paştî danê têkoşînê azadîye yê kurdan û wazenê wa PKK lîsteya terorî bêro vetene.” 
Anja Flacha ke bi nameye Komîteya Azadîye qisey kerd, Kenan Ayaz sey şervanê azadîye name kerd û vat ê zî erjanê ey pawenê û tim paştî danê ci.

Birayê Ayazî zî Orhan Ayazo ke semedê mehkeme Swêdî ra ame, vat înan sey keyeyî bedelê pîlî dayî û do heta peynî dewaya xo bidê domnayene.

Dewaya Kenan Ayazî do 7ê kanûna peyêne roja sêşemeyî dewam bikero.