Yeno waştene ke Dewa Çoçellî ya qezaya Pazarcikî ya Gumgumî de ke tede elewîyî ciwîyenê, ocaxêkê kerrrayan bêro viraştene.  Pawitoxê heqanê merdiman û hemwelatîyî seba ke roje îptal bibo xîret kenê. Eke dewe de ocax bêro viraştene pêro cuye d binê tehlukeyî de bimana.

Domananê dewe venga selahîyedaran da ke dewe de ocax nêwazenê. Deijî qerqilîyenê ke eke ocaxê kerrayan abibo ê do nêeşkê heywananê xo biçêrnê û ocaxe do zerar bido xozaya dewe. Dewijêke venga dewijanê bînan da ke wa çew erdê xo nêroşo û pare kerd ke ê na dewe de bîyî û do na dewe de bimirê.

Dewijêka kokime zî vat: ''Kamî wazenê nê erdî bikişê, na dişmenîya çita ya? Ma nê erdî ser o ocaxê kerrayan nêwazenê.''

Dewijêkê bînî zî vat: ''Xora fabrîkaya çîmentoyî ma rê bîya bela, nika zî ocaxê kerrayan. Eke dînamîtî biteqê ma do senî awe gênê? Ma nê erdî de ocaxê kerrayan nêwazenê. Ma pêro vera ney ê. Ma wayîrê erdê xo vejîyenê.''

Muxtarê verênî yê dewe zî vat: ''Verê cû ma rê vat ke têna fabrîkaya çîmentoyî do biba. La nika zî vanê ocaxê kerrayan. Ma ganî bêveng nêmanê ke nê koyê ma seba çîmentoyî bêrê fedakerdene. Eke ocaxê kerreyan bêro cuya ma hînî qedîyena. Wa her kes bizano ke ma do vera ney têkoşîn bikerê û vera ocaxê kerrayan vinderê.''

Şîwanêkê dewa Çoçellî zî wina vat: ''Çew goş nêkuweno fikranê dewijan. Eke ocaxê kerrayan abibo ma û heywanê ma do nêweş bibê. Beno ke ma pêro kanser bibê. Ma venga selahîyetdaran danê ke dewa ma binê tehlukeyî de ya, na dewe çin mekerê.''