Hemsereka DEM Partî ya Amedî Pinar Sakik Tekin şewatê Amed û Mêrdînî sey felakete name kerd û vat berpirsîyarê şewatî DEDAŞ o.

Şewatê mabênê Amed û Mêrdînî de  yo ke 20ê hezîrnae de vejîya tesîrê warê 66 kîlometreyî kerd. Şewat de 15 kesan dinyaya xo bedilnaye û 78 kesî birîndar bîyî.

Hemsereka DEM Partî ya Amedî Pinar Sakik Tekina ke derheqê şewatî de ANFyî rê qisey kerd, vat îxmal û bêtedbîrîye  ra na felakete qewimîyaye.

Pinar Sakik Tekin nê vatî: ''Ma bi pêro awanîyanê xo vazdayî gazîya şarê xo. Ma paştî daye, dejê ci pare kerd. Dejê şarê ma dejê ma yo. No qeder nîyo. Xora DEDAŞ bîyo belayê sereyê şarê ma. Bi sûcdarkerdişê şarî ê nêeşkenê mîyanê na babete ra bivejîyê.  Çi heyf ke na felakete rîyê îxmal û bêtedbîrîya DEDAŞî ra qewimîyaye. Rixmê heme hîşyarkerdişê şarê ma DEDAŞî goş nêda şarî tedbîrî nêgirewtî.

Hetkarîya dewlete  badê 12 saetan resaye warê şewatî. Ma erdlerz de zî dî 36 saete cuwa pê cewab da. Na felaketa şewatî de zî badê 12 saetan kerdke bibo cewab la cewabo qîmkerde nêbi. Bitaybetî cografyaya Kurdîstanî de nizdîbîyayîşê dewlete yo bêxem ser o ma firkîyenê. Felaketan de zî cîyayîye est a. Gama ke zirar dîyeno kurdan û Kurdîstanî dewlete wayîr nêvejîyena.''