Hemsereka DADî Kadrîye Dogan Qirkerdişê Gazî sey qirkerdişanê bînan ê vera elewîyanî ra hesibna û vat: ''Çiwext elewîyî bêrê têhet  û qala nasname û bawerîya xo bikerê dewlete vera înan cade hêriş kena.''

Qirkerdişê Gazî 27 serrî xo dima verdayî.Taxa Gazî ya Îstanbulî de ke tede kurdê elewîyî ciwîyenê 12ê adara 1995î de taksîya bazirganîye ra vera qewexaneyan hêriş ame kerdene û netîceya nê hêrişî de Pîrê Elewîyan Halîl Kaya ame qetilkerdene. Naye sero elewîyî semedê protestoyî ame têhet. Polîsan şarî ser o guleyî varnayî û Mehmet Gunduz qetil kerd, xeylêk kesî zî birîndar kerdî. Roja bîne 15 hezar kesî seba protestoyî ameyî taxe. Polîsan panzeran ra guleyî kerdî şarî ser ra û Taxa Gazî gonî de verdaye. Hêrişê hêzanê dewlete de 15 kesan dinyaya xo bedilnaye. 15ê adare de kesê ke Taxa Gazî de ameyî têhet ke qirkerdişî protesto  bikerî ê zî raştê hêrişê dewlete ameyî. Polîsan 5 kesê bînî qetil kerdî. Nameyê şehîdanê Gazî wina yê:Halil Kaya, Mehmet Gunduz, Zeynepe Poyraz, Fadime Bingol, İsmihan Yuksel, Ali Yildirim, Dileke Sevinç, Reis Kopal, Fevzi Tunç, Mumtaz Kaya, Genco Demir, İsmail Baltacı, Hasan Pugan, Hasan Sel, Sezgin Engin, Dinçer Yilmaz, Hasan Gurgen, Hakan Çabuk, Yaşar Aydın, Dilek Şimşek, Dinçer Yılmaz ve Hasan Ersizer.

Badê di serran demê muhakemekerdişî dest pêkerd.Rixmo ke qirkerdiş Îstanbul de bi û merdimê kesanê ke ameyî qetilkerdene zî tîya de yê dewa Trabzon de ameye kerdene. Keyeyanê ke merdimê înan ameyî qetilkerdene 31 rey otobusî tepiştî û pê înan Îstanbulî ra şîyî Trabzon, tewrê dewa bîyî, hesab persayî. Rixmo ke îdarkaranê hukmatê dewrî Mehmet Agir û Necdet Benzîrî pê fekanê xo îtîraf kerd ke qirkerdiş pê destê dewlete ame kerdene qet kiştoxêk nêame cezakerdene. 20 polîsan ra 18 kesan beraat kerd. Polîsê bînî Adem Albayrak û Mehmet Gundogan zî pêro pîya cezaya şeş serran û heşt mengan girewte û cezaya înan çarçeweya êfu de ameye destgirewtene û peyde ameye eştene.

Hemsereka Komeleyanê Elewîyan ê Demokratîkan (DAD) Kadrîye Dogan derheqê Qirkerdişê Gazî û hêrişanê vera elewîyan de ANFyî rê qisey kerd.  Dogane vist vîrî ke elewîyî seserre yo raştê qirkerdişan yenê û vat: ''Qirkerdişê Gazî zî qirkerdişanê tarîxê 1400 serrîye yê elewîyan ra yew o.  Taxa Gazî de serranê 90yan de elewîyê Dêrsim û Sêwasî ciwîyayêne.Şaro feqîro ke rîyê barkerdişî ra amebi tîya sere ra rîyê polîs, dewlete mafyaya erazî ra tengayî ante. Çiwext elewîyî semedê nasname û bawerîya xo bêrê têhet, no rehetê dewlete xeripneno. Gazî zî nînan ra yew bi. Cemxaneyê şarî estê, dede û pîrê ci estê û ca wazenê pê ercanê xo biciwîyê. Zafê nê elewîyanê ke uca ciwîyenê muxalîfê dewlete yê. Coka dewlete gama ke qewexaneyan de sixletî esta hêriş kerd û bi qetilkerdişê pîrêkê elewîyan qirkerdiş da destpêkerdene. Cara sey Sêwes, Mereş û Çorum terz û metodî eynî yê.

Elewîyî çiwext heqanê xo biwezê raştê hêrişê dewlete yenê. Têna destur dîyeno ke CHP de estbîyayîşê xo îfade bikerê. Qetî destûr nêdîyeno ke azadîya xo biwazê. Destûr nêdîyeno ke elewîyî wayîrê statuyî bê,heqê xo biwazê û xo rêxistine bikerê. Tirkîya dewaya Qirkerdişê Gazî de Mehkemeya Heqanê Merdiman a Ewropa de mehkum bîye. Komara Tirkîya qirkerdişê xo ra ne şarmîyaye, ne eciz bîye ne poşman bîye. Nê rayîrê qikerdişan de dewam kena. Çi heyf ke dewlete elewîyan layiqê nê vînena. Demê peyênî de reyna vera cemxaneyan hêrişî yenê kerdene û cezayî yenê dayene. Bi serran o ne estbîyayîşê elewîyan yeno qebulkerdene ne şansê ciwîyayîşê bi erjanê înan dîyeno. Modelê cuya elewîyan o ke eşkeno semedê dinya bibo nimûne seba ke hetê îqtîdaran ra tim sey tehluke yeno vînayene, nîno qebulkerdene.''