Polîsan hêrişê çalakîya bi şîarê 'Tepişteyanê nêweşan rê azadîye' a Înîsîyatîfê Paştdayîşê bi Tepişteyan (TDÎ)  kerdbi û 17 kesî destbend kerdbî. burcugule Çubuk seba ke testê ci yê Korona pozîtîf vejîya cade vera dîyabî, 16 kesê bînî zî ewro bi şertê kontrolê edlîyî vera dîyayî.

Hemvervatoxa HDKyî Esengule Demîr, Hemserekê Partîya Bindestan a Sosyalîste (ESP) Şahîn Tumuklu, Hemserekê HDPyî yê Îstanbulî Ferhat Encu, endamê Mayanê Haştîye û temsîlkarê rêxistinanê komelê sivîlî verê edlîye de ameyî pêser û eşkerayîyêke daye.

Endama Înîsîyatîfê Mayanê Haştîye û merdima tepişteyê nêweşî Kumrîye Akgul tîya de qisey kerd û vat: ''Ma domananê xo ra ber çîyêk nêwazenê.''

Esengule Demîr da zanayene ke dewlete tepişteyanê nêweşan terkê mergî kena û na zî metodêkê ceza yo. Demîre vat: ''Ma bexşe, rîca nêwazenê, ma huqûq û edaletî wazenê. Ma do vera binpaykerdişanê heqan têkoşînê xo rê dewam bikerê.''

Ferhat Encuyî vat: ''Her roje tepişteyê nêweşî mirenê. Dadîyî seba ke domanê înan nêmirê vengê xo berz kenê. La AKP-MHP vera nê qîrayîşî bêveng o û pê tecrîdî keno ke vengê dadîyan bibirno û îradeyê tepişteyan teslîm bigêro.''

Hemserekê ESPyî Tunukluyî venga pêro şorişgêran, demokratan û têkoşeranê heqanê merdiman da ke wa vera tecrîdî û seba heqê cuye hetê xoverdayoxan de ca bigêrê.