Kongreya Komelê Demokratîkî ya Kurdîstanijanê Ewropa (KCDK-E) û Têgêrayîşê Cinîyan ê Kurdan ê Ewropa (TJK-E) da eşnawitene ke înan seba vîrardişê qurbananê felaketê erdlerzî 3 rojî şîn rona û seba ke hetkarîye  bi lezûbez  biresa keyeyanê hewcedaran veng da.

 Eşkerayîye de nê ameyî vatene:

''Serdestîya faşîste ya AKP-MHPyî ke cografyaya Kurdîstanî rê şer û qirkerdişî ra vêşêr çîyêkî nêkerda, nê felaketî zî tena temaşe kena. Serdestîya AKP-MHPyî ferz kena ke hetkarîya merdimîye tena bi raya AFADî bêra kerdene û bi no hewa nêverdana ke hetkarî biresa mexdûran. Wazena ke hetkarî zî verê biresa terefgiranê aye. Mîyanê nê felaketî de zî ê rantî dima yê. Hewldayîşê Odaya Tabîban a Tirk yê erşawitişê tîmê weşîye zî kenê problem.

Cayê Kurdîstanî ke seba şerî awanîyê serê erdî û binê erdî bi hewayêko giran ameybî rijnayene, bi felaketê erdlerzî hem hetê madî hem zî hetê manewîyî ra reyna ame weşanayene. Dewleta tirke ya faşîste sebebê yewin ê dejê madî, manewî û qirkerdişê şarê ma ya. Coka eşkera yo ke na dewlete do hemverê nê felaketî de tedbîran nêgêra û hetkarîya ke hewce ya, nêkera. Seba ney ma venga merkezê xo yê komelîyan şarê xo yê şorişger, demokratîk, entelektuel û her kesanê ke terefgirê merdimîye yê, danê ke wa hemverê nê felaketî de bibê seferber.

Ma zanê ke kurdistanijê teberê welatî, do nanê xo û îmkananê xo mexdûranê erdlerzî reyde pare bikerê. Nê hetkarîyî zî gere bi raya Heyva Sor a Kurdistanî bêrê kerdene. Gere her kes seba hetkarî û destekî bibo seferber. Seba ke hetkarî biresa şarê Vakur û Rojawanê Kurdîstanî bi raya konfederasyon, federasyon, merkezê komelî, sazgehê bawerîye û esteyê înan, masayê krizî ameyî awankerdene û ame waştene ke bi raya nê masayanê krîzan nêzdîbîyayîşêko no tewir bêrê nîşandayene:

-Hetkarîyî bi raya Heyva Sor a Kurdistanî bêrê koordînekerdene ke wa bi lezûbez biresê mexdûran.

-Merkezê ma yê komelîyî yê bajaran do şêrê serepirodayîşê keyeyanê mexdûran êyê ke erdhej tesîrê înan kerdo. Seba serweşîye zî do komeleyê ma xîzmet bidê.

-Ma venga her kesî danê ke welatî de banê înan est ê ke, wa bananê xo pêşkêşê mexdûranê erdlerz bikerê û nê rojanê zehmetîyan de paştîdayîşî xurt bikerê.''

Eşkerayîye de bi nameyê KCDK-E û TJK-E keyeyanê qurbanê erdlezî rê serweşîye ameye waştene û birîndaran rê zî şîfa ameye hêvîkerdene.