Polîsanê dewleta Belçîka şaristanê Denderleeuwî de şewe bi hawayêkê barbarî eştbi bînaya Stêrk û Medya Haber TVyî û studyoyê wird kanalan zî serûbin kerdbî. Polîsanê Tirkîya zî 6 rojnamegerî Îstanbul û Anqara de destbend kerdî.

Komeleya Rojnamegeranê Dîcle-Firatî (DFG) û Komeleya Rojnamegeranê Cinîyan ê Mezopotamya (MKG) bi eşkerayîyêke operayonê Belçîka û Tirkîya yê vera çapemenîya azade şermezar kerdî û seba paştdayîşî veng da.

DFGyî eşkerayîya xo de pare kerd ke nê hêrişî tesadufî nîyê û rojêke verê cû Roja Rojnamegerîya Kurdan bîya. DFGyî da zanayene ke îqtîdarê Tirkîya keno ke qesasê binkewtişê xo yê 31ê adare rojnamegeran ra bigêro. 

DFGyî vat: ''Belçîkaya ke tim qalê azadîya fikran kena, tede embazê ma ameyî hedefkerdene. Ma operasyonanê vera Stêrk TV û Medya Haber TVyî şermezar kenê.Ma do tim raştîyan vajê, binusê û erkê xo bîyarê ca. Ma venga îqtîdarî danê ke hêrişê şima do nêeşkê çapemenîta azade bitersnê. Wa embazê ma yê ke ewro ameyê destbendkerdene cade vera bidîyê.''

MKGyî vat: ''Îstanbul û Anqara de ewro xeylêk embazê ma ameyî destbendkerdene. Nê hêrişê vera çapemenîya azade qetî nênê qebulkerdene. Rojnamegerî kokê komelê demokratîkî yê. Bi destbendkerdişî û bi hêrişanê bînan vera azadîya komelî hêriş yeno kerdene. 

Ma venga her kesî danê ke wayîrê çapemenîya azade vejîyo. Ma venga dezgehanê heqanê merdiman a mîyanneteweyîyan zî danê ke heqanê rojnamegeran bipawê. Wa embazê ma yê destbendkerdeyî cade vera bidîyê. Rojnamegerîye sûc nîya.''