Komeleya Rojnamegeran a Dîcle-Firatî (DFG) raporê xo yê huqûqî yê 2024î eşkera kerd.

Rapor de doneyê derheqê hetkarîya huqûqî ameyî parekerdene û wina ame vatene: ''2024 de bi her hawayî hêriş û tedayanê vera rojnamegeran dewam kerd. 2024 de paştdayîşo huqûqî dîya 152 rojnamegeran, ma beşdarê 49 dewayan bîyî û ma seba îfadedayîşan zî avûkatî erşawitî rojnamegeran. 

Dewayanê ke ma teqîb kenê de 6ê ci bi beratî qedîyayî la ê bînî dewam kenê. Ma îstînaf de, Mehkemeya Berze û Mehkemeya Qanûnê Bingeyî (MQB) de heqê 10 embazanê xo pawitî. Ma îtîrazê qefilnayîşê keyepelanê rojnamegeran kerd. Ma derheqê kerdişanê xiraban ê vera 31 embazanê xo de gerreyê sûcî kerd. 

Wexto ke ma no rapor amade kerdêne eşnawit ke embazê ma yê rojnamegerî Nazim Daştan û Cîhane Bîlgîn bi hêrişê SÎHAyan ameyê qetilkerdene. Ma do hesabê qetilkerdişê nê embazanê xo bipersê.

Ma seba pawitişê embazanê xo yê rojnamegeran kargehî zî serûber kerdî. Bi beşdarîya avûkatê ma Resûş Tamurî  ma kargehan de agahîyî dayî 30 rojnamegeran. Ma do serra 2025î de zî rojnamegerîye bipawê. Ma do ne nuştişê raşrîye ra ne zî rojnamegerîye ra fek vera bidê.''