Komeleya Rojnamegeran a Dîcle û Feratî (DFG) muxabîrê Ozgur Gundemî Hafiz Akdemîr yad kerd ke qezaya Sûrî ya Amedî de 8ê hezîrana 1992î de amebi qetilkerdene. 

Eşkerayîye de ame vatene ke kedkarê çapemenîya azade seba ke raştî biresnê şarî ya tepişîyayî yan dest bend bîyî, dîyayî vînkerdene û kişîyayî. Înan ra yew zî Hafiz Akdemîr bi.

Eşkerayîye de ame vatene ke Akdemîr rojnameyê Yeni Ulke de dest pê muxabîrîye kerd û rojnameyê Ozgur Gundemî de têkoşînê xo dewam kerd. Akdemîr  hetê hêzanê kontra ra ame qetilkerdene. Eşkerayîye de ame vîrvistene ke verê buroyê rojnameyî de gefê 'Qelema şima do bêro şiknayene' amebi wendene la Akdemîrî cigêrayîşê raştîye ra fek vera nêda.

Rojnameger Hafiz Akdemîr 8ê hezîrana 1992î de qezaya Sûrî ya Amedî de peyê xo ra pê guleyêk ame qetilkerdene. Eşkerayîye de ame vatene: ''Akdemîr qelema şikîyaye ya ke aîdê rojnameran ê bînan bîye girewte û raywanê raştîye zî bîyî teqîbkerdoxê ey. Hafiz Akdemîr ame qetilkerdene la qeleme û kameraya ey erd de nêmende.

Ma reyna îfade kenê ke ma do bibê teqîbkerdoxê têkoşînê Hafiz Akdemîrî.''