Vervatoxê Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' Hatîp Dîcle derheqê hemle de ANFyî rê qisey kerd.

Dîcleyî ard ziwan ke hemle bi pêşnîyaz û serkêşîya dostanê kurdan de dîyaya destpêkerdene û vat: ''10ê teşrîna verêne de 74 merkezanê dinya de bi eşkerayîyan hemle dîyaye destpêkerdene. Îdarekaranê na hemle seba azadîya Nelson Mandelayî zî kar kerdbî. Têgêrayîşê Azadîye û şarê Kurdîstanî wayîrê hemle vejîyayî û hemle nika her warê dîplomasî, sîyasîyî û sivîlî de bi xurtî dewam kena. Heta nika seba azadîya Rayber Apoyî zaf kar û xebatî ameybî kerdene. La na hemle nînan ra cîya ya, hemleyêka stratejîk a. Na hemle heta caardişê azadîya Rayber Apoyî waranê dîplomasî û sîyasîyan de do dewam bikera. Nika ra pey zî bingeyê pêro xebat û çalakîyan de do na hemle est ba.''

Dîcleyî îfade kerd ke Rayberê Şarê Kurdî qetî rojdemê şarê kurdî û dostanê înan ra nêkewto û vat: ''Mehkemeya Heqanê Merdiman a Ewropa (MHME) bire dabî ke çew 25 serran ra zêdeyêr nêeşkeno zîndan de bimano. Rayber Apo 25 serran ra nata zîndan de yo. Tirkîya her roje bira MHME binpay kena. Senî ke Afrîkaya Başûre û Serekê ci De Klerkî verê azadîya Mandelayî de tena mendî waştişê 'Abdullah Ocalanî rê azadîye' zî Tirkîya tena verdaye. Tirkîya yan azadîya Ocalanî qebul bikera yan zî tena bimana. Şar û dostê kurdan tim rewşa 'heqê hêvîye' rojdemê xo de verdê û wayîrê Rayber Apoyî vejîyê.

Heta ke Rayber Apo azad bibo û meseleya kurdan çareser biba haştîye nêra Tirkîya. Coka ganî ma xebatanê xo bi xurtî bizêdînê. Ewro sebebê pêro krîzanê Tirkîya meseleya kurdan a. Rewşa ke Tirkîya kewta ci sey rewşa Afrîkaya Başûre ya.''

Dîcleyî peynîya qiseykerdişê xo de venga pêro kurdîstanijan û dostanê înan da ke 17ê sibate de Koln de beşdarê rayraşîyayîşê merkezîyî bibê.