Çarçeweya operasyonê qirkerdişê sîyasîyî de Dilgeşo 3 serre  pîya bi maya xo roja roşanî şawîya zîndan. HDP û Komeleya Cinîyan a Rosa ra heyetêk şîyê zîyaretê Dilgeşî.

Buroyê Çapemenîye ya HDPyî derheqê pêvînayîşî de zanayîş da. Goreyê naye Zîndanê Cinîyan ê Amedî de maya Dilgeşî Gonule Aslan, endamê merkezê HDPyî Ozleme Gunduz û cinîyê tepişteyî bînî ameyî zîyaretkerdene.

Heyetî da zanayene ke tepişteyî sey grûbanê 4 kesan semedê 14 rojan binê tecrîdî de gerîyayîşê karantîna. Reyna ame vatene ke seba ke roşan de kantîn qefilnaye bi tepişeyî nêeşkayî çîyêk bîgêrî. Dilgeşo ke nêweşê velgano o zî nêeşkayo hewceyanê xo yê lezabezan bîgêro.

Ame vatene ke seba ke hucreyê tecrîdî de televîzyon çîn o, zor dîyeno Dilgeşî û no zî tepişteyanê bînan ser o tesîro xirab keno. Di wayûbirayê Dilgeşî yê 7 û 14 serreyî zî teber de têna mendî. Coka maye Gonule Aslan hetêkî ra semedê Dilgeşî hetê bînî ra semedê domananê xo yê bînan qerqilîyena.