Wasîyê Abdullah Ocalanî Mazlum Dînçî derheqê tecrîdê Îmraliyî yê vera Rayberê Şarê Kurdî Abdullah Ocalanî de ANFyî rê qisey kerd.

Mazlum Dînçî îfade kerd ke rejîmê îşkence û tecrîdî yê Îmraliyî 1999 ra nata dewam keno û no rejîm sey hacetê şantaj û bazarî şuxilîyeno. Dînçî vist vîrî ke 25ê adara 2021î ra nata ê Ocalanî ra xebere nêgênê û cewab nêdîyeno muracatanê keye û avûkatan.

Dînçî vat: ''Na rewşe rê incommmunicado vajîyeno. Mehkemeya Heqanê Merdiman a Ewropa (MHME), Komîteya Heqanê Merdiman a Neteweyanê Yewbîyayeyan (NY), incommmunicado sey binpaykerdişê qedexeye îşkenceyî vîneno. La heyf ke dezgehê mîyanneteweyî vera ney bêveng ê û wayîrê tewirêkî nîyê. Wexto ke babete Birêz Ocalan bena nê dezgehî menfatanê xo ra nê binpaykerdişî peygoş kenê.

MHME 2014 de derheqê Ocalanî de bire daye ke cezaya muebede ya girankerde îşkence yo û 8 serrî yo rixmo ke dewleta tirke na bire nêarde ca Komîteya Wezîran zî tewirêko aktîf nêvet werte û bi têkoşînî reyna no ard rojdem. Hêzê serdestî seba ke paradîgmaya Birêz Ocalanî vera menfatanê xo sey tehlukeyî bînenê, polîtîkayanê îmha û înkarî yê vera kurdan û Ocalanî nêvînenê û pê tewirê xo wayîrê nê polîtîkayan vejîyenê.''

Dînçî dîyar kerd ke Komployo Mîyanneteweyî bi tecrîdî dewam keno, komplogerî peyê Tirkîya de vindenê û vat: ''Eke tecrîdê vera Birêz Ocalanî wuroz û o fikranê xo biresno komelî o çax kayê komplogeran û polîtîkayê înan do pûç bibê. Nê hêzê Abdullah Ocalanî ra komplogerî tersenê. Dewleta tirke pê qedexeyê pêvînayîşî qanûnanê xo binpay kena. Tirkîya meseleya kurdan de polîtîkayê mîlîtarîstî girewtî xo ver û bi nê hawayî tecrîd kerd giranêr.''