Rayberê Şarê Kurdî Abdullah Ocalan 25 serrî yo Zîndanê Îmraliyî de binê sîstemê îşkence û tecrîdî yê Îmraliyî de tepişîyeno. 25ê adara 2021î ra nata Rayberê Şarê Kurdî ra xeberêke zî nêna girewtene.

Wekîlê Partîya Têdûştîye û Demokrasîyî ya Şaran (HEDEP) a Wanî Mahmut Dîndarî derheqê tecrîdê Îmraliyî de ANFyî rê qisey kerd.

Dîndarî ard ziwan ke tecrîdê Îmraliyî hînî pêro welatî rê vila bîyo û vat: ''Tirkîya de sebebê krîzê ekonomîkî budçeya şerî ya. Şer zî rîyê tecrîdî ra dewam keno. Ma çend reyî vatbi ke Birêz Abdullah Ocalan eşkeno haştîye bîyaro ca. Seba ke tecrîd nêwedarîyeno Tirkîya de bêhuqûqîyî yenê kerdene. Mehkemeya Heqanê Merdiman a Ewropa çend reyî bire dabî ke ganî Birêz Ocalan bieşko keye û avûkatanê xo bivîno. La hukmatî nê birî nêardî ca. Hukmatê AKP-MHPyî tecrîd de israr keno, bi tecrîdî Qanûnê Bingeyînî û qanûnanê mîyanneteweyîyan binpay keno.

Seba ke verê Tirkîya abibo, aktorêkê sey Birêz Ocalanî şensêko pîl o. Ewro pêro mesele û şerî tecrîdî ra semed qewimîyenê. Coka ganî cade Tirkîya tecrîdê vera Birêz Ocalanî wedarna. Eke tecrîd nêro wedaritene Tirkîya hîna zaf do zerar bivîna. Ganî cade tecrîd biqedo û Birêz Ocalan zîndanî ra vejîyo.''