Wekîla Demokratanê Swêdî Sara Gille pê di vernîyazanê persî operasyonê qirkerdişê sîyasî yê ke dewleta tirke pê hemkarîya cerganê DAÎŞî vera kurdan kena vistî rojdemê parlamento. Gille vernîyazê xo yê verênî de Wezîra Karanê Teberî Ann Linde ra persa ke seba qedînayîşê hêrişanê dewleta tirke yê vera şarê kurdî hukmat çi fikirîyeno, senî hetkarîya kurdan bikero.

Vernîyazê diyînî de zî Gille da zanayene ke Tirkîya hetê rêxistinanê terorî ra sey welatêkê transîtî yena xebitnayene û cerganê DAÎŞî petrol rot Tirkîya û nêweşxaneyanê Tirkîya de ameyî weşkerdene.

Wezîra Karanê Teberî Ann Linde vizêr bi hawayêkê nuştekîyî cewab da vernîyazê verênî yê Gille û pare kerd ke nê serebûtê ke Tirkîya de qewimîyenê nêzdî ra yenê teqîbkerdene.

Linde îfade kerd ke nêno qebulkerdene de sîyasetmedarê muxalîfî pê sûcdarîyanê bêbingeyan wezîfe ra bêrê dûrvistene, tepiştene û herinda înan de kesê bînî yenê tayînkerdene. Linde vat: ''No bi taybetî zerar dano partîya muxalefete HDP. Muxalefeto azad şerto verên ê komelê pirreng û demokratîkî yo.''

Linde ard ziwan ke înan teda û neheqîya vera HDPyî û kurdan ser o Stockholm û Anqara de pêvînayîşan de selahîyetdaranê tirkan reyde qisey kerd.

Lînde vat: ''Swêd de sere de roniştişê dewayanê Selahattîn Demîrtaş û Fîgene Yuksekdag roniştişê dewayanê sîyasetmedaran yenê teqîbkerdene. Ma platformanê cîyayan de anê ziwan ke ganî sîyasetmedarê HDPyî û tepişteyê bînî yê muxalefetî bêrê veradayene. Hukmat bi nê hawayî binpaykerdişê heqanê merdiman ê Tirkîya visneno rojdemê platforman ê mîyanneteweyîyan. Ma Yewîya Ewropa de zî bale ante ser ke Tirkîya tay sîyasetmedarî vera dayî la sîyasetmedarê muxalefetî vera nêdayî."

Linde vist vîrî ke hukmatê Swêdî hêrişê leşkerî yê dewleta tirke yê vera Rojawanî şermezar keno û vat: ''Ez girîngîya prosesêkê haştîye nîşan dana ke na do seba pêro herême do baş biba.''

Yeno pawitene Linde destpêkê menga temmuze de do cewab bida persê têkilîyanê mabênê Tirkîya û DAÎŞî.