Dîwanê Edaletî yê Ewropa dewaya ke Yewîya Ewropa (YE) vera lîsteya rêxistina terorî ra vetişê PKKyî berdebî temyîz, qerar da. Dîwanî vat argûmanê qerarê 2018î de kêmî û Mehkemeya Pêroyîye rê peyser şawit.

Goreyê Dîwanê Edaletî argûmanê Mehkemeya Pêroyîye yê derheqê lîsteyê terorî kêmî. Na çarçewe de qerarê 14 madeyano ke Mehkemeya Pêroyîye semedê PKKyî girewto ganî  nînan ra 13 madeyî dahîna zaf  bêrê zixmkerdene.

Goreyê avûkat Mahmut Şakaro ke sere ra dewa teqîp keno no nîno manaya lîste de mendişê PKKyî. Şakarî vat: ''Mehkemeya Pêroyîye wexto ke qerar girewt 7 argumanê hetê kurdan ra têna yew girewt ke vat o têna semedê lîsteyî ra vejîyayîşî bes o. Nika nê heme argûmanî do bêrê rojdem.'' Endamê Konseya Rayberdişî ya KCKyî Zubeyîr Aydar zî vat: ''Ma xora wazenê wa dewa hîra bêro kerdene heme detayî bêrê qalkerdene. Sey dewaya Belçîka wa hîra bêro destgirewtene. Ez pê bawer a ke prosesê verê ma de do qeraro raşt bêro girewtene.''

2014 de îdarekaranê PKKyî ra Murat Karayilan û Duran Kalkanî pê avûkatanê Hollanda Luksemburg de vera lîsteya terorî ya Yewîya Ewropa dewa akerde. Na dewa 15ê kanûna 2018î de ameye netîcekerdene. Dîwanê Edaletî  vat îdîayê mabênê serranê, 2014-2017î semedê qedexeyê PKKyî qîm nêkenê. La YE no qerar berd temyîz.

Badê qerarê Dîwanî Îngîlîstan reyna 2018 de seba ke PKK lîste de bimano muracat kerd û sey otomotîkî 9ê çeleyê 2019î de PKK newe ra gerîya lîste. Lîste şeş mengan de rayêke yeno aktuelkerdene la ge-ge 2 serran de beno. Hetê kurdan 7ê adara 2019î de vera lîsteya newîye dewa akerde. Yewîya Ewropa 2021î de reyna PKK lîste de ca kerd. Narey hetê kurdan hewteyê verênî yê nîsane vera na lîste dewa akerde. Nika Lunksemburg de derheqê PKKyî de hîrê dewayî yenê rayraberdene.

Gama ke YE sey otomotîkî PKK girewt lîste edaletê Belçîka derheqê PKKyî de qeraro tarîxî girewt. Mehkemeya Îstînafî 8ê adara 2019î de qerar da ke PKK rêsixtina terorî nîya û sey ''PKK hêzêko çekdarî yê bêdewlete yo'' name kerd.