Weçînayîşanê herêmîyan ê 21ê adare de namzedê Şaredarîya Amedî yê DEM Partî Dogan Hatun û Serra Bucak ê. 

Dogan Hatunî derheqê proje û xebatanê înan ê weçînayîşan de ANFyî rê qisey kerd.

Dogan Hatun qezaya Pasûrî ya Amedî de dadîya xo ra bîyo. Ey mabênê serranê 2016-2023yî de erkê hemserekîya Odaya Muhendîsanê Madenî kerd û mabênê serranê 2018-2022yî de zî Sekreterîya Heyetê Koordînasyonê Amedî yê TMMOByî kerde. Hatunî heta nika mîyanê xeylê rêxistinanê komelê sivîlî de rolê aktîfî ardî ca.

Hatunî bale ante texrîbatê qeyûman ê vera Amedî ser û vat: ''Seba ke ma sûc û texrîbatê qeyûman dîyî, bi mesuldarîya naye bîyî namzed. Vera polîtîkayanê talan û bêusûlîye yê qeyûman ganî têkoşîn bêro kerdene. Seba ke ma vera qeyûman vejîyayî ameyî muhakemekerdene. La ma mesuldarîya xo tim do bikerê. Xeylêk çîyî est ê ke ganî ma seba ney şaristanî bikerê. Warê ziwan, kultur û hunerî de xeylêk projeyê ma est ê. 

Rîyê polîtîkayanê qeyûmî ra şarê Amedî nêeşkeno bi îradeyê xo yê azadî biciwîyo. Ganî merdim qeyûman raşt tehlîl bikero. Qeyûman qetîyen xizmetê şarê ma nêkerd. Qeyûman pêro dezgehê cinî, ciwanan, ziwan û kulturî qefilnayî. Înan vatêne qey bi xespkerdişê şaredarîye her çî hal bikerê. Qeyûmî vera xizanîye û bêkarîye tênêgêrenê. Dizdîye, rant û talanî ra  ber polîtîkayêka înan a bîne çin a.''

Hatunî îfade kerd ke wexto ke ê bêrê erkê xo ser şaristanî do newe ra awan bikerê û vat: ''Ma do newe ra destkewteyanê şarê xo bivisnê destî û prosesê awankerdişî bidê destpêkerdene. Prosesê awankerdişî de ma do şarê xo reyde erdê xo yê zengînî bi bereketî awan bikerê. Seba şaristanî projeyê ma yo tewr girîng tramvay o. Wextê Osman Baydemîrî de no proje amebi xêzkerdene la wezîrîye proje red kerdbi. No şaristan şaristanêko qedîm o û ma do tim wayîrê ci vejîyê.''