Namzedê Şaredarîya Amedî yê DEM Partî Dogan Hatunî derheqê xebatanê weçînayîşî, texrîbatanê qeyûman û asayîşê weçînayîşan de ANFyî rê qisey kerd.

Hatunî îfade kerd ke şar bi coşî tewrê xebatanê înan beno û wazeno ke îradeyê xo qeyûman ra apey bigêro. Hatunî bale ante ser ke şaristan de seba ciwanan xebatî nênê kerdene û vat: ''Xizanîye û bêkarîye ra ciwanî şinê teberê welatî. Şaristan de ciwanî musenê madeyanê tîryakî. Ganî ma ciwananê xo nê xirabîyan ra bixelisnê. Eke ma bêrê karî ser ma do hêverî na mesele çareser bikerê. Wextê qeyûman ra nata 8 serrî yo şaristan de xebatê kultur, ziwan û hunerî nênê kerdene. Qeyûman tim seba çinkerdişê înan xîret kerd. Şarê ma hesreta xebatanê kultur û hunerî ancena. 

Ferasetê qeyûman 100 serrî yo est o. Qeyûmî tim nasname, ziwan û kulturê şarê ma kenê hedef û nînan qedexe kenê. Hêverî no feraset bi rayîrê OHAL û qirkerdişan ameyêne caardene, nika zî bi destê qeyûman yeno caardene. Wextê şaredarîyanê ma de şarî rê xizmet ameyêne kerdene. Şarê ma bi ziwan û kulturê xo ciwîyayêne, cinîyan rê dezgehî ameybî akerdene. La qeyûman çita kurdan temsîl keno qedexe kerd.''

Dogan Hatunî dîyar kerd ke sere de walîyî pêro dezgehê dewlete dûştê DEM Partî de xebitîyenê û vat: ''Ma zanenê ke 33 şaristanan de polîsan û leşkeran ra weçînitoxî ameyî qeydkerdene. Pêro dezgehê dewlete û YSK zî mîyanê nê karî de yê. Yeno xîretkerdene ke îradeyê şarî bêro xespkerdene. Ez venga karkeranê serrwextî, wendekaran, karkeranê înşaetî û pêro şarê ma yê teberî danê ke sîstem ho keno ke îradeyê şima xesp bikero. Şima kamca şaristan de benê wa bibê eke muracatê ma bikerê ma do mesrefa rayîrî bidê. Ez bi taybetî venga weçînitoxanê nê 33 şaristanan dana. Ma tîya de kenê ke îradeyê şarê xo ancî bîyarê ca. Ganî na babete de şima zî mesuldarîye bigêrê co milî.''