Dozgerî Newroze Uysal rê cezaya zîndanî ya 15 serran waşte
Dewaya avûkata Rayberê Şarê Kurdî Abdullah Ocalanî Newroze Uysal de dozgerî cezaya zîndanî ya 15 serran waşte.
Çarçewa tehqîqatêkê vera KCDyî de derheqê avûkata Rayberê Şarê Kurdî Newroze Uysal de bi îdîaya 'endamîya rêxistine' dewa amebî akerdene. Roniştişê dewa Mehkemeya Cezaya Girane ya Amedî de ame kerdene. Avûkatê Uysale Gulane Çagin Kalelî û Mehdî Ozdemîr tewrê roniştişî bîyî.
Dozgerî îdîa kerde ke Uysale tim tewra çalakîyanê KCDyî bîya û waşt 'endamîya rêxistine' ra cezaya zîndanî ya 15 serran bêra dayene ci û bira kontrolê edlîyî dewam bikera. Avûkatan seba pawitişî wet waşt.
Mehkeme waştiş qebul kerd û dewa taloqê 15ê adare kerd.
