Kurdîstan û Tirkîya de weçînayîşanê herêmîyan ê 31ê adare de rejîmê AKP-MHPyî yê faşîstî darbêka girane werde. Akademîsyen Dr. Îsmet Konakî derheqê babete de ANFyî rê qisey kerd.

Dr. Îsmet Konakî ard ziwan ke weçînayîşê 31ê adare mîyanê şarî de bîyî sebebê kêfweşîye. Konakî bale ante dek û dolabanê îqtîdarî yê seba şaristananê kurdan ser û vat: ''Îqtîdarî teberî ra weçînitoxî ardî la ancî zî nêeşka netîceyêka weşe bigêro. Şirnex de walî, qeymeqam, mudirê asayîşî pêro seba AKPyî xebitîyayî. Nê karmendê dewlete yê û bi bacanê şarî meaşê xo gênê. La înan erdê kurdan de propagandaya AKPyî kerdêne ke na partî îradeyê kurdan xesp kena. Weçînayîşan de bi nê hawayî îqtîdarî Şirnex û Bedlîs vistî destî la a raşte Vakurê Kurdîstanî û Bedlîs de bin kewt. Îqtîdar nêeşka netîceya ke pawitêne bivisno destî.''

Dr. Îsmet Konakî dîyar kerd ke îqtîdarê AKP-MHPyî netîceyanê weçînayîşan ra razî nîyo û vat: ''Îqtîdar nêwazeno binkewtişê xo qebul bikero û keno ke nê binkewtişî binimno. Naye ra dafikanê neweyan amade keno. Rewşa nikayêne de ekonomî seba înan hol nîya. Yanî îqtîdar nêeşkeno bi rayîrê ekonomî merdiman bixapîno. Sîyasetê vêşanîye qedîya. Seke Samîr Amîrî vatbi 'Sîstemo needîl seba înanê hêzdaran qezençî seba înanê qelsan xizanîye afernano.' Nika no sîstem est o û îqtîdar zaneno ke şar nê sîstemî ra qayîl nîyo. Coka îqtîdar do hîna zaf muracatê kaosî bikero. Yanî sey serra 2015î îqtîdar do provakasyonan bikero. Aseno ke şer do est bo. Rejîmê AKP-MHPyî şer seba xo sey felate vîneno.

Na babete de Erdogan û Putin manenê pê. Putinî vera Ukrayna şer da destpêkerdene. Nê şerî ra ver se ra 77ê Rûsya paştî dayêne Putinî. Weçînayîşê peyênî de se ra 87ê şarî paştî daye Putinî. Putinî muxalefet bi temamî pasîfîze kerd. Erdogan zî wazeno nê metodî bişuxilno. La Rûsya û Tirkîya nêmanenê pê. Seba ke Erdogan bieşko Başûrê Kurdîstanî de şerêko newe bido destpêkerdene ci rê çime û ekonomîya xurte lazim ê. La hêzê Tirkîya yo winayên çin o. Coka şer seba rejîmê Erdoganî do netîce nêdo. Eke Erdogan vera kurdan şerêkê neweyî bido destpêkerdene no şer do bibo întîharê ci. La ganî ancî dînamîkê muxalîfî verê provakasyonan de baldar bibê, tedbîran bigêrê.''