Wekîlê Parlamentoyê Kontonê Ticinoyî yê Swîsre Dr. Beppe Savaryo ke paştgîranê Hemleya 'Abdullah Ocalanî rê Azadîye, Meseleya Kurdan rê Çareserîya Sîyasîye' rê yew o, derheqê tecrîdê Îmraliyî û nîqaşanê peyênan de ajansê ma rê qisey kerd.

Dr. Beppe Savaryî polîtîkaya tecrîdî ya dewleta tirke bi giranî rexne kerde û vat: ''Tecrîdê vera huqûqê mîyanneteweyîyî yo. Rejîmê Erdoganî zaneno ke Abdullah Ocalan eke azad bibo bi rolê sîyasî û haştîyaneyî wurzeno ra. Tersê Ocalanî ra rejîm tecrîd de israr keno. Ocalan mîyanê tecrîdî de zî seba şarê kurdî têkoşîn keno. 

Goreyê mi ancax Abdullah Ocalan do bieşko meseleya kurdan a ke 100 serran ra nata dewam kena, çareser bikero. Na rewşe Nelson Mandelayî ana vîrê mi. Eke Mandela azad nêbîyêke çareserîye nêbîyêne.''

Savaryî nîqaşê peyênî yê serê meseleya kurdan ercnayî û vat: ''Eke dewleta tirke raşta zî çareserîye wazena ganî Abdullah Ocalan azad bibo. Pêşnîyazê Ocalanî seba pêro Rojhelatê Mîyanênî benê çareserîye. Bêmana yo ke PKKyî rê yeno vatene ke wa çeke war verdo. Yanî seba çareserîye hêverî azadîya Ocalanî lazim a. Dima ke Ocalan azad bibo û Tirkîya samîmîyetê xo bimojna haştîya mende do bêra caardene.''

Dr. Beppe Savaryî dîyat kerd ke prosesêkê mabênê dewleta tirke û kurdan de Swîsre û komelo mîyanneteweyî eşkenê bi mesuldarî têbigêrê û vat: ''Heyf ke Wezîrê ma yê Karanê Teberî Swîsre vurnaya sey Amerîla. Goreyê min Swîsre eşkena rewşêka prosesî de bi rolê serkêşî têbigêra. Ancî Almanya zî eşkena ney bikera.''

Savaryî bale ante qedexeyê vera PKKyî ser û vat: ''Qedexeyê vera PKKyî verê çareserîya meseleya kurdan gêno.  Ganî Amerîka û welatê Ewropa ney ra fek vera bidê. Ganî PKK lîsteya terorî ra bêro vetene.''

Dr. Beppe Savaryî Hemleya Azadîye viste vîrî û vat: ''Na hemle tedaya vera hukmatanê Ewropa û hukmatê tirkî kena. Şertê çareserîye yo bingeyîn azadîya Ocalanî yo. Heta ke Ocalan azad nêbo meseleya kurdan zî çareser nêbena. Coka ganî na hemle her ca de bêra pîlkerdene. Ganî ma têkoşînî rê bêmabên dewam bikerê.''