Avûkate Ebru Tîmtîka semedê hukmkerdişê edîlî çalakîya rojeyê mergî kerde û roja 238. de dinyaya xo bedilnaye, hetê merdiman û heskerdoxanê xo ra ameye definkerdene. Parlamenterê HDPyî Musa Pîroglu û Dîlşate Canbaz Kayayî pîya xeylêk sîysetmedarî û temsîlkarê rêxistinanê komelê demokratîkî tewrê merasîmî bîyî.

Cenazaya Tîmtîka ke pê cubeyê ci  ameye piştene û bi vilikan ameye xemilnayene ermeyanê cinîyan ser o ameye ardene warê merasîmî. Merasîm de goreyê tradîsyonê elewîyan duayî ameyî wendene. Avûkatanê ke tîya qisey ker hemeyan sozê pîlkerdişê têkoşînê Tîmtîke da. Badê rêzgirewtişî endamanê Grup Yorumî deyîrê ke Tîmtîke tira heskerdêne vatî.

Dima ke pîya bi wesayîtê cenaza şar ver bi Goristanê Gazî kewt rayîr polîsan pê bombayanê gazî hêriş kerd. Hêrişî de xeylêk avûkatî ameyî derbkerdene. Rixmê hêrişan rayaşîyayîşî dewam kerd. Ebru Tîmtîk pê cubeyê xo ameye definkerdene.  Merasîmo ke deyîr û lawikî ameyî vatene de mesajê ''avûkatê şorişgerî do teslîm mebê'' ame dayene. Badê merasîmî şaro ke goristanî ra ver bi taxe agêra reyna raştê hêrişî ame, 6 kesî ameyî destbendkerdene.