Tepişteyê dewaya PKK û PAJKî seba çareserîya meseleya kurdan û azadîya Rayberê Şarê Kurdî Abdullah Ocalanî 27ê teşrîna peyêne ra nata grevê vêşanîye de yê.

Endama Komîsyonê Zîndanan ê Şubeyê Amedî yê Komeleya Heqanê Merdiman (ÎHD) Avûkate Esra Saçakli derheqê babete de ANFyî rê qisey kerd.

Esra da zanayene ke heyetê ke Baroyê Amedî, ÎHD, OHD, MED TUHAD FED û TUAY DERî ra yenê pê tim zîndanan zîyaret kenê û binpaykerdişanê heqan teqîb kenê. Esra vat: ''Ma çimdarîyê xo kerdî rapor. Raporan de dîyeno ke tepişteyan rê cezaya dîsîplînî, cezaya hucreyê yewkesî dîyena. Tepişteyanê grevê vêşanîye rê awe, şeker û sole nêdîyenê. Hetê bînî ra grev de rewşa tay tepişteyan bîya giranêr. Ancî îdareyê zîndanan nêverdenê ke tepişteyê grevî heqanê xo yê aktîvîteyan bişuxilnê. 

Ganî tepişteyê ke nêweş ê û ê bînê ke grevê vêşanîye de yê bi nîzamî kontrolê weşîye bivînê. Tepişteyan ma rê vat ke înan rê kontrolê şekerê gonîye nênê kerdene. Tepişteyê grevî ganî bi nîzamî awe, şeker, karbonat, vîtamînê Byî bigêrê. Eke nê çîyî nêrê dayene mezgê tepişteyan de texrîbê cidîyî do biqewimîyê. Îdareyê zîndanan seba ke îradeyê tepişteyanê grevî bişiknê zaf rayîran ceribnenê.''

Esra bale ante ser ke tepişteyî heta ke waştişê înan bêrê caardene grevî rê do dewam bikerê û vat: ''Ma dî ke tepişteyî grevê xo de qerardar ê. Tepişteyî wazenê ke meseleya kurdan zemînêkê demokratîkî de wa bêra çareserkerdene. Dewlete seba çareserîya na mesele ganî game bierza û çareserîyêke peyda bikera. Nêbo grevê vêşanîye do dewam bikerê.''