Vervatoxê Înîsîyatîfê 'Abdullah Ocalanî rê Azadîye' yê Sûrîye Ferzende Munzurî eşkerayîyê dewleta tirke yê peyênî, pêvînayîşê bi Rayber Apoyî û mesajê Rayber Apoyî yo peyên ANFyî rê ercnayî.

Ferzende Munzurî bale ante eşkerayîyanê selahîyetdaranê dewleta tirke ser û vat: ''Bahçelîyî vato wa Rayber Apo şoro Meclîs de qisey bikero. Se bi ke o qalê dîyalog û çareserîye keno? Xoverdayîşê Rayber Apoyî û têkoşînê bêmabênî yê şarê kurdî  rewşe resnaye na aste. Dewleta tirke ha qels bena, mîyanê krîzan de ya. Rojhelato Mîyanên ho newe ra yeno dîzaynkerdene. Verê dewleta tirke de meseleya tewr pîle meseleya kurdan a û Rayber Apo zî muxatabê na mesele yo verên o. Ganî verê sîyasetê kurdan ê demokratîkî bêro akerdene.

44 mengan ra nata Rayber Apo binê tecrîdêkê mutleqî de yo. 44 mengan ra dima Rayber Apoyî de pêvînayîş ame kerdene û ey ancî nîyetê xo yê seba çareserîye eşkera kerd. Goreyê qanûnan Rayber Apo ganî tim bieşko keye û avûkatanê xo bivîno. Eke dewleta tirke zî nîyethol a ganî hêverî merkezê îşkenceyî yê Îmraliyî biqefilna.

Ganî Rayber Apo keyeyêk de cabibo, tîya ra bieşko bi asanî pêvînayîşan bikero û fikranê xo rayaumûmîye de pare bikero. Haştîye teyna wina bena. Heqê Rayber Apoyî destpêkî ra nata Îmrali de yenê binpaykerdene. Ganî hinî o bieşko 'heqê xo yê hêvîye' bişuxilno. Bi berzkerdişê têkoşînî û xoverdayîşî ma do heqê azadîye yê Rayber Apoyî bîyarê ca.

Rayber Apoyî pêvînayîşê xo yê peyênî de ard ziwan ke tecrîd ho dewam keno ke no vera provakasyonanê dewleta tirke cewabêk o. Rayber Apo mîyanê ê şertan de zî seba çareserî û dîyalogan têgêreno. Ganî şert û mercê dîyalogan virazîyê. Bi çend eşkerayîyan meseleya kurdan çareser nêbena. La eke dewleta tirke raşta zî çareserîyêka mende û emrderge wazena ganî goreyê xorinîya mesele têbigêra û gamêka bicesarete bierza. Erdoganî her wextê weçînayîşan de vatêne ke kurdî xapîyenê. 

Hemleya 'Rayber Apoyî rê Azadîye, Meseleya Kurdan rê Çareserîye' kewta serra diyîne. Armancê na hemle caardişê azadîya Rayber Apoyî û çareserîya meseleya kurdan a. Çarçewa ney de serra diyîne de karê hîra û girseyîy do bêrê kerdene.''