Dewleta tirke ya kolonyalîste xîret kena ke cerganê xo reyde Lîbya bi temamî îşxal bikera. Serekê Komîteya Têgêrayîşê Şarî yê Neteweyî yê Lîbya û Hetkarê Wezîrê Karanê Teberî Dr. Mustafa El Zaîdîyî derheqê meseleya Lîbya de ANFyî reyde qisey kerd.

Dr. Mustafa El Zaîdîyî îfade kerd ke rewşa nikayênî ya Lîbya giran a û vat: ''Hukmayê Anqara bi hêzê xo yê hewa, erd û dengizî kewt Lîbya. La nînan zî qîm nêkerd û Anqara Sûrîye ra cergê xo ardî  Lîbya. Dewleta tirke Sûrîye û Iraqî ra dima nika zî wazena Lîbya îşxal bikera. Ma bi dokumentan zanenê ke îstîxbaratê tirkî MÎTî DAÎŞ visna Iraq û Sûrîye. Dewleta tirke bi paştdayîşê hêzan ê mîyanneteweyîyan Lîbya de şer kena xorin.

Ma sey kurdan nika Lîbya de xo ver danê. Her kes pê zaneno ke Lîbya hetê çimeyanê petrolî ra zengîn a. Coka wazenê Lîbya îşxal bikerê. Selahîyetdarê tirkî vanê 'Lîbya ma rê mîrasê verînanê ma ya.' Oyo ke ê Lîbya de kenê îşxal û talan o. Ganî her kes bizano ke Tirkîya qet Lîbya de ca nêbîya û şarê Lîbya qet Osmanijî qebul nêkerdî. 

Cerganê tirkan Lîbya îşxal kerde. Nê cergî sivîlan sey mertalan xebitnenê. Nê cergî heyfo ke Sûrîye ra yê. Meseleya Lîbya bi cergan çareser nêbena. Tîya de estbîyayîşê înan problem o. Mesele bi yewî û îtîfaqê hêzanê Lîbya çareser bena. Ganî Tirkîya û cergê înan welatê ma ra vejîyê. Armancê Erdoganî têna îşxal o. 

Nameyê Têgêrayîşê Neteweyî yê Pêroyî yê Lîbya ser o ez wazena vaja ke ma sey partî û dezgehanê xo vera Tirkîya hetê kurdan de yê. Tewirê ma verî ra wina bi. Neteweyê kurd û erebî wayûbirayê yewbînan ê. Kurdî bêguna yê. Asîmîlasyonê tirkan ê vera kurdan do qet ser nêkewo. Ez venga çepê tirkan dana ke wa rayîr nêdê hêrişanê vera kurdan û vera Erdoganî tewirê xo bimojnê. Kurdî rixmê top, tank û teyarayan heqanê xo do bivisnê destî.''