6ê sibate de Mereş de 2 erdlerzî tê dima bîyîbî û tesîrê xo 10 bajaran rê est bî. Bi des hezaran însanî merdî û bi des hezaran însanî zî hema binê xirban de yê. Tay dewî ke seba vewre rayîrê înan girewte bî, erdlerzî ra 4 rojî dima ekîbê xebatî eşkîyayî xo biresnê înan. Nê dewan de êyê ke binê xirban de mendî, tayê înan dewijan bi îmkananê xo bin ra vetî la zafê înan cemidîyayî û binê xirban de merdî. 

Binê xirban de veşayî û cemidîyayî

Mehlaya Mîrelî de 2 kesî erdlerzî ra dima adirî mîyan de mendî û veşayî û 2 kesî zî serdî ra cemidîyayî. Rayîrê na mehla erdlerzî ra 4 rojî dima ame akerdene û cenazeyî ameyî wedaritene. Dewijan da zanaye ke, înan se kerdo zî la reyna kepçeyêk nêerşawîyayo û nas û merdimê înan binê xirban de cemidîyayî. 4 rojan ra dima kepçeyêk ameyo erşawitene ke mezelan bikeno.

Maye û waye 4 rojî binê xirbî de mendî

Kutsîye Çakmake ke bi lingan şîya hetê keyeyê maya xo wina îfade kerd, ‘‘Rayîrî girewte bîyî. Ez nêeşkîyaya şêrê hetê keyeyê maya xo. Mi xo eşt vernîya kepçeyan, mi vat, ‘rayîrî akerê’. La kes goş nêda mi. Ez bêçare bi rojan vinderta ke şêra hetê maya xo. Dima ma bi îmkananê xo xo resna uca. Waya mi 42 serre bîye. Mi aye ra vat, ‘vinde, deyax bikere, heta ke kepçeyî yenê’ la verê ke kepçeyî bêrê maye û waya mi rehmet kerdî. 4 rojî kepçe senî nêyeno yaw?! Hêvîya mi hende zaf bî ke, mi vatêne nika kepçe yeno ma înan xelisnenê. La nêame û mi may û waya xo vindî kerdî.’’

‘Ma îsyan kerd la reyna zî kepçe nêame’

 Azîz Yapiciyo ke maye û waya xo bi destanê xo binê xirbî ra vetî, behsê mucadeleya xo kerd û wina vat, ‘‘Maye û waya mi 4 rojî binê xirbî de mendî. Rayîrî girewte bîyî û ez bi payan ameya dewe. Ez des rey zî bi payan şîya qeza û ameya ke kepçeyêk bigîra bîyara ke may û waya xo biveja la kesêkî kepçe nêerşawit. Ma vat-vat, ma îsyan kerd la înan vat îmkanê ma hend ê. ne ekîba weşîye ne zî yê gêrayîş û xelisnayîşî ameye. Nika zî ma bi îmkananê xo cenazeyanê xo wedarenê.’’

Wedaritişê cenazeyan ra dima êyê ke Keyeyî ra mendî, mehla xo terikna û şîyî bajarêkê bînî.