Elewîyî do seba Turgut Oker 'Nobeta Edaletî' bigêrê

Elewîyê endamê AABK, AAKB û AAGByî seba Serekê Rûmetî yê AABKyî Turgut Okero ke derheqê ci de qedexeyê teberê welatî esto roniştişê ci yê 18ê hezîrane ra verî 13ê hezîrane de do her cayê Ewropa de 'Nobeta Edaletî' bigêrê.

Derheqê Serekê Rûmetî yê Konfederasyonê Yewîya Elewî yê Ewropa Turgut Okerî de qiseykerdiş û eşkerayîyan ra semed tay dewayî ameyî akerdene. Rixmo ke Oker tewrê pêro roniştişan bi zî derheqê ci de qedexeyê vejîyayîşê teberê welatî yeno caardene.

Roniştişê dewaya Okerî 18ê hezîrane de Edlîyeyê Kartalî yê Îstanbulî de do bêro kerdene. Roniştişî ra verî Konfederasyonê Yewîya Elewîyan ê Ewropa (AABK), Yewîya Cinîyan ê Elewîyan a Ewropa (AAKB) û Yewîya Ciwanan ê Elewîyan a Ewropa (AAGB) pêro şaristananê Ewropa de do 'Nobeta Edaletî' bigêrê.

Eşkerayîya rêxistinan de derheqê babete de wina ame vatene: ''Her roje dest nêno şaredarîyan ser, şaredarî wezîfe ra yenê girewtene, qeyûmî yenê tayînkerdene, hêzê paramîlîterî yenê awankerdene, çapemenîye hetê îqtîdarî ra yena îdarekerdene. Coka ma sey elewîyan zaf qerqilîyenê.

Turgut Oker seba qiseykerdiş û eşkerayîyanê xo ra yeno hukmkerdene. Pê nê hukmkerdişî elewîyî û rêxistinê elewîyî zî yenê hukmkerdene.''