14ê hazîrana 2018î de qezaya Pirsûsî ya Riha de merdim û pawitoxanê wekîlê verên ê AKPyî Îbrahîm Halîl Yildîzî mêrde û lajê Emîne Şenyaşar qetil kerdî. Şenyaşare bi serran Nobeta Edaletî tepişte. Emîne Şenyaşar pîya lajê ci Ferît Şenyaşaro ke hêriş de birîndar xelisîya û nika wekîlê DEM Partî yo, têkoşînê xo reyra berd.

Bado ke  Ferît Şenyaşar bi wekîl Nobeta Edaletî 26ê temuza 2023yî de Riha ra kirişîyaye verê Wezîrîya Edaletî ya Anqara. Keyeyê Şenyaşarî meclîs de bi eşkerayîyanê çapemenîye waştişê edaletî ard ziwan.

Roja 49.  ya çalakîye de Wezîrê Edaletî Emîne Şenyaşar reyde pêvînayîş qebul kerd. Ferît Şenyaşarî vat dayîka ey waşt ke lajê ci yo ke 6 serrî yo bîlasebeb zîndan de wa bêro veradayene û Wezîrê Edaletî û hetkaranê ey zî  nê qewimîyayîşî sey neheqîye hesibnayî û vat sebr bikerê.

Naye ser o Emîne Şenyaşar amelîyatê xo ke peyser eştbi bîye û qerarê mabêndayîşê çalakîye girewt. La rixmo ke 5 mengî ravîyartî na babete qet gamêke nêameye eştene. Hetê bînî ra heqê telefonî yê heftane ê Fadil Şenyaşarî zî destê ci ra ame girewtene, pêvînayîşê telefonî hinî di hewteyan rayêke beno.

Ferît Şenyaşarî vat nê sebeban ra do pîya bi dayeke Emîne Şenyaşar verê Wezîrîya Edaletî de  roja 50. de çalakîya xo rê dewam bikerê.

Ferît Şenyaşarî vat, ''Ma do ewro fîtarê xo verê Wezîrîya Edaletî de abikerê. Edaleto ke dayîka mi wazena, semedê her kesî yo. Rojêke do her kes hewceyê nê edaletî bo. Ma nê prosesî de paştî bidê têkoşînê dayîka mi û pêro pîya peynîya bêadeletîye bîyarê.''