Emîne Şenyaşara ke wird lajê ci û mêrdeyê ci hetê pawitox û merdimanê Wekîlê AKPyî Halîl Îbrahîm Yildizî ra kişîyayî lajê xo Ferît Şenyaşarî reyde 22 rojî yo verê Edlîyeyê Riha de nobeta edaletî kena.

Emîne Şenyaşar û Ferît Şenyaşar ewro roja 22. de  reyna ameyî destbendkerdene. Polîsan pê zorî keye erdî ra wedarna û berd.

Keyeyê Şenyaşarî twitterî ser o  na eşkerayîye daye: ''Têkoşînê ma yê edaletî qesra edaletî de roja 22. de dewam keno. Serdozger her roje verê ma ra derbaz beno, ewnîyeno la ma nêvîneno. Her çiqas Wezaretê Edaletî ma nêeşnawo zî her roje Tirkîya û Ewropa ra paştî dîyena ma.''