Emîne Şenyaşara ke mêrde û di lajê ci hetê merdimanê Wekîlê AKPyî Îbrahîm Halîl Yildizî ra ameybî qetilkerdene lajê xo Ferît Şenyaşarî reyde verê Edlîyeya Riha de çalakîya nobete rê dewam kena. Keyeyî 9ê adara 2021î de dest pê çalakîye kerdbi.

Keyeyê Şenyaşarî roja 364. de reyna ame verê edlîye. Dayîke Emîne Şenyaşar bale ante teda û zorbazîya vera înan ser û venga her kesî da ke 9ê adare de 'waştişê edaletî' bikero.

Emîne Şenyaşar vat: ''Serrêk a ma tîya de seba her kesî edaletî wazenê. Heta ke lajê mi bêro veradayene ez do tîya de biba. Lajê mi zîndan de yo, ma tîya de yê. Kiştox zî bi serbestî gêrenê. No senî edalet o? Na senî dewlet a? Ma venga her kesî danê ke 9ê adare de bêro tîya û waştişê edaletî bikero.''