Enstîtuyê François Mitterandî Xelata Cesaretê Sîyasetî daye Hemserekê verênî yê Selahattîn Demîrtaşo ke Zîndanê Edîrne de tepişîyeno. Nameyê Demîrtaşî ser o Hemvervatoxê Têkilîyanê Teberî yê HDPyî Hişyar Ozsoyî xelate girewte.

Demîrtaşî merasîmê xelate rê mektubêke şawite. Demîrtaşî mektube de ard ziwan ke o na xelate nameyê pêro HDPgîranê tepişteyan ser o qebul keno û vat: ''Seke şima zî zanenê ez hema zî tepişte ya coka nêeşkena na xelate bigêra. Ez hêvî kena ke rojêke na bêhuqûqîye do biqeda.''

Serekê  Enstîtuyê François Mitterandî Hubert Védrineyo ke Wezîro verên ê Karanê Teberî yê Fransa yo qiseykerdişê xo de pare kerd ke înan pê na xelate paştdayîşê xo yê bi têkoşînê Demîrtaş û HDPyî mojna.

Enstîtuyê François Mitterandî zî Demîrtaşî rê mektubêke şawite û vat: ''Cenabê to demokratîkî û eseranê xo ra layîqê na xelate ame dîyene. Jurîyê xelate binê tesîrê cesaret, cehd û perwerîya cenabê to de mendo. Ma hêvî kenê ke na xelate do biba wesîleya azadî û berdewamîya têkoşînê cenabê to.''