Wekîlê HDPyî yê Çewlîgî Erdal Aydemîrî Meclîs de qisey kerd. Aydemîr pê ampulêk, maydanoz û şûşeyê awe meseleyê şarî ardî ziwan.

Aydemîrî vist vîrî ke hukmatê AKPyî cezaya muebede daye Bagerê 17 serrî û vat hukmatê AKPyî û rejîmê Kenan Evrenî manenê pê.

Erdal Aydemîrî fotografê Îlhan Çomakî mojnayî kursîyanê îqtîdarî û vat: ''Çomak wexto ke 20 serre bi tepişîya û bê delîlan 28 serrî yo zîndan de yo. Mehkemeya Heqanê Merdiman a Ewropa 2 reyî dosyaya dewaya ci seba muhakemekerdişê edîlî xeripnaye û şawite. La Îlhan Çomak hema zî zîndan de yo. Ey zîndan de xeylêk kitabî nuştî û xelatê mîyanneteweyî dîyayî nê kitaban. ''

Aydemîrî vat: ''Semsûr de merdimêkî Serekwekîlê AKPyî Mahîr Unalî rê vat 'Ez vêşan a, bêkar a. Gureyê betalî war verdê, mi rê çareserîyêke bivînê.' La Unalî nêvat ke no şûşe heta îqtîdarê AKPyî nêame berardene. Semra Arslan Gebze de esnaf a. A maydonazan roşena û aye mi rê vat ke 'Ez 2,75 lîra ra nê maydonozî gêna û tira 2.5 lîra qezenç kena. Meclîs de qala ney bikerê. Seba ke mi heta nika raya xo dabî AKPyî ez poşman a.' ''

Aydemîrî dima ampul mojna û vat: ''No ampulê şima yo. Weçînayîşê verênî de Semra Arslan û merdimê bînî do nê ampulî biteqnê.''