Bado ke dewleta tirke Başûrê Kurdîstanî de bitaybetî herêma Metîna de dest pê hêrişê îşxalî yê neweyî kerd, Erdoganî Baxdad û Hewlêr zîyaret kerdî.

Wezîrê Karanê Teberî Hakan Fîdan, Wezîrê Karan Zereyî  Alî Yerlikaya, Wezîrê Pawitişê Mîlîyî Yaşar Guler, Wezîrê Bazirganî Omer Bolat, Wezîrê Resî û Bineawanî Abdullkadir Uraluglu, Wezîrê Citkarî û Daristanî Îbrahîm Yumakli û xeylêk wezîrê bînî tewrê heyetê Erdoganî bîyî. 

Baxdad de Erdogan Serekkomar Latîf Reşîdî reyde ame têhet. Pêvînayîş çapemenîye rê qefilnaye ame kerdene û nêdîya zanayene ke çi ameyo qiseykerdene. Erdogan dima ra Serekwezîr Muhammed Şîa Sudanî reyde ame têhet. Pêvînayîşan de mabênê Iraq û Tirkîya de 26 pêkerdişî ameyî îmzakerdene.

Badê pêvînayîşê Erdogan û Sudanî kombîyayîşê çapemenîye yo hempar ame kerdene. Erdoganê ke kombîyayîş de qisey kerd seba ke Iraqî PKK sey “rêxistina qedexe” îlan kerd, kêfweşîya xo ard ziwan û vat înan pîya bi Iraqî sero qisey kerdo ke senî do vera PKKyî gaman bierzê.

Erdogan badê zîyaetê Baxdadî şi Hewlêr û tîya hetê Neçirvan Barzanîyî ra ame pêşwazîkerdene. Barzanî hesabê xo yê Xî ra bi tirkî semedê Erdoganî kêfweşîya xo ard ziwan.