Wekîlê DEM Partî yê Amedî Serhat Erenî ANFyî rê qerarê boykotkerdişê mehkemeyan û nêvejîyayîşê telefon û pêvînayîşê keye û avûkan yê tepişteyanê PKK û PAJKî  yo ke 4ê nîsane ra dest pêkerd, erjna. Erenî vat sîstemê tecrîdî de qet huqûq çîn o tecrîd tesîrê heme şaranê Tirkîya keno.

Erenî nê vatî: ''Tepişteyî sîstemê tecrîd û bêhuqûqîye protesto kenê ke waştişê înan heqdar o. Tecrîdê serê Abdullh Ocalanî semedê qedînayîşê têkoşînê azadîye yê kurdan yeno kerdene. No xoverdayîşo qerardar ê tepişteyan mojneno ra ke têkoşîno heqdar ê kurdan rixmê heme zextanê îqtîdarî dewam keno. Meseleya kurdan bi rayîrê demokratîkî eşkena bêro çareserkerdene. Tepişteyê sîyasîyî sey her wextî wayîrê têkoşînê azadîye vejîyenê, ci rê serkêşîye kenê û vanê têna bi çareserkerdişê meseleya kurdan nê krîzî eşkenê bêrê çareserkerdene. Tepişteyî semedê çareserîya haştîyane komelî rê benê nimûne.''

Erenî wina dewam kerd: ''Heta ke tecrîd dewam bikero, meseleya kurdan nîna çareserkerdene. Heme polîtîkayê dewlete nê şerî serî ra yenê kerdene, tay zafêr benê zengîn û şar dahîna ben feqîr. Herinda çarserkerdişê meseleya kurdan de butçeya girane semedê şerî yena xerckerdene. No pereyo ke semedê şerî yeno xerckerdene ganî semedê şarê bêro şuxulnayene. Ganî şarê Tirkîya vera şerî vengê xo berz bikero û çareserîya meseleya kurdan biwazo. Semedê nê zî ganî her kes bi vengê berzî vera tecrîdî bivejîyo. Eke meseleya kurda bêro çareserkerdene şarê Tirkîya zî rehet keno, tengayî ra vejîyeno. Coka ganî her kes paştî bido waştişê demokratîkî şarê kurdî.

Tepişteyî vanê ê do mevejîyê mehkemeyan. No qerarê înan vera hukmê ke bêhet û xoser nîyo, xoverdayîşêk o. Ewro Tirkîya de muhakemekerdişî têna qale de yenê kerdene. Naye rê nimûneya tewr pîle zî Dewaya Kobanê ya. Bi talîmatê îqtîdarî bi des hezaran hemrayê ma zîndan de yê. Tecrîd bi destê hukmî yeno kerdene ke bi talîmatê îqtîdarî têgêreno. Sîstemê tecrîdî de qet huqûq çîn o tecrîd çend şino tesîrê heme şaranê Tirkîya keno.''