Endamanê heyetê KNKyî ra û Endama Defend Kurdistan Lida Weertsa norwêçije derheqê rewşa koçberanê sînorê Polonya-Belarusî de ANFyî rê qisey kerd.

Weertse pare kerd ke goreyê doneyanê înan nika sînor de tewr tay 3-4 hezar merdimî estê û vat: ''Belarus verê koçberdan dano sînorê Lîtvanya. Yanî serê sînorê Lîtvanya de zî koçberî estê. Neteweyê Yewbîyayeyî, Yewîya Ewropa, Amerîka, Almanya derheqê babete de tênêgêrenê. Tirkîya, Rûsya û Belarus pîya têgêrenê û koçberan semedê menfaatanê xo şuxilnenê. Yewîya Ewropa zî wazena hêzê xo bimojna Belarusî. No kayêko pîl o û çew nêwazeno xo apey bigêro. 

Mi çim de PDK raşta raşte mîyanê nê karî de nîyo la vetişê merdiman de rolê ci esto. Ez êlule de Başûr de bîya. Mi uca de xeylêk merdiman reyde qisey kerd. Her kes wazeno Başûrî ra şoro. No zî mesele de rolê PDKyî mojneno. Ganî hukmatê Başûrî meseleya koçberan de çareserîya lezabeze peyda bikero.''

Weertse îfade kerd ke ganî Yewîya Ewropa semedê koçberan wurza payan ser û vat: ''Ganî ma sey merdimanê Yewîya Ewropa, Yewîya Ewropa rê teda bikerê ke a zî Belarusî rê bikera. Koçberî nêweşî, vêşanîye û serdî ra nêweş kewenê. Nêweşxaneyanê sînorî de xeylêk koçberî estê. Mumkîn nîyo ke merdim nê koçberan daristanan de verdo. La eke koçberî daristanî ra vejîyê leşkerê Polonya do înan bikişê. Rewşa Polonya zî zaf zehmet a.

Ganî merdimê Ewropa hînî fekê xo abikerê û na rewşe qebul mekerê. Ganî ewropayîjî wurzê payan ser û na rewşe şermezar bikerê. Ganî merdimî bimojnê ke ê nê polîtîkayan qebul nêkenê.''