Serkêşîya Sendîkaya Karkeranê Depoyî, Bender, Terxane û Dengizî (DGD-Sen) de 12 rojî  yo xoverdayîşê karkeranê Depoyê CarrefourSa yê Esenyurtî dewam keno. Hakan Kiremano ke waştişê zemî ra karî ra ameyo vetene ANFyî rê qalê xoverdayîşê înan kerd.

Kiremano ke şîrketa taşerone Onur de 8 mengan de depo de xebitîyayo da zanayene ke şertê xebate zaf xirab ê û vat: ''Ma tim qeza kenê la ne sewqê nêweşxaneyî benê ne zî rapor dîyeno ma. Werdo ke dîyeno ma nêwerîyeno, tira cam ûsn vejîyenê. Seba ke ma endamê sendîka yê tim selahîyetdaran û mudirî ma tehdît kerdêne. Ma bi meaşê 22 hezar lîra xebitîyayêne, ma waşt ke ma rê 5 hezar lîra zem wa bêro kerdene. Seba nê waştişî ma karî ra ameyî vetene.

Berpirsîyarê şîrketa taşeronî seba ke ez tewrê xoverdayîşî nêba 90 hezar lîra teklîfê mi kerd. Xora mi qebul nêkerd. Ez semedê pereyî xoverdayîşê xo rê fek vera nêda. Ganî her kes marketanê CarrefourSa boykot bikero. Ez têkoşînî rê dewam bikera û bimira zî do apey game nêerza.''