Dewa Bameydanî ya qezaya Farqînî ya Amedî de pêkewtiş qewimîya û ame îdîakerdene ke hîrê gerîlayî şehîd bîyî. Badê pêkewtişî leşkeranê tirkan herême girewt binê ablûqa û dima herêma ke koçberan tede xeymê xo nayê ro, tîya de operasyon kerd. Keyeyêkê koçerî ra 5 kesî pê îşkenceyî ameyî destbendkerdene.

Kesê ke ameyî destbendkerdene ameyî berdene Mudirîya Cendirmeyan a Silvanî. Domano 9 serre yo ke amebi destbendkerdene pêra teslîmê merdimanê keyeyî bi.  Dîya zanayene ke kesê ke ameyî destbendkerdene do badê kontrolê weşîye bêrê berdene Fermanarîya Cendirmeyan a Diyarbekirî.

Badê pêkewtişî xeymê koçeran vêşayî ke nîno zanayene ke leşkeran vêşnayî ya zî wextê pêkewtişî de şewat vejîya. Herême de ablûqaya polîsan dewam kena. Merdimanê keyeyê D.yî vat înan derheqê îşkenceyî de muracatê Komeleya Heqanê Merdiman (ÎHD) a Êlihî kerd.