Federasyonê Elewîyanê Demokratîkan (FEDA) bi eşkerayîyêke bale ante hêrişanê vera elewîyan ser û nê pare kerdî:

''Têna bîlançoya nê rojanê peyênan mojnena ra  ke vera elewîyan senî hêrişî yenê kerdene. Murat Belge yo ke qaçîko roşnvîr o bawerîya ma ya erjîyayîye elewîtîye sey ensestî pênas kerda.  Kesêko xo hunermend hesibneno zî kerd ke pê elewtîye bîyêqûnî bikero. Huda Par Dêrsim de namzedo elewî veto  û banê pîrê ma Seyîd Riza zîyaret kerdo û eşkerayîye kerda. Xora hewce keno ma yew bi yew cewabê înan bidê. Reyna Erdoganî rê zî qala ma est a ke verê înan ey akerd.

Murat Belgeyî açarnayîşê kitabêkî de vateyê kizilbaşî sey ensestî açarnayo. No zî mojneno ke o roşnvîr nîyo. Têna zafwendiş merdimî roşnvîr nêkeno. 20 mîlyon elewîyî bi erjanê xo ciwîyenê. Elewîyî xeylêk rey raştê qirkerdişan ameyî. Wina pênaskerdişê elewîtîye xetayêko wirdi nîyo. No eşkera tewirê qirkerdişî yo.

Bêehleqîya bîne zî hetê kesê bînî ra ameye kerdene ke xo sey hunermendî pênas keno. Canê erjîyayeyî kesê bi nameyê Ozkan Çelîkî yê nêzanî kerd ke ziwanê xo elewîtîye rê derg bikero. Çi eceb o ke  Ozkan Çelîk huner kerdo aletê emelanê xo yê xirabinan. Heqê çewî çîn o ke hunerî wina leymin bikero.

Babeta muhîmî ya bîne zî aya ke Huda Par Dêrsim de namzedê xo veto û nê namzedî pêkerê pîrê ma Seyîd Rizayî zîyaret kerdo. Ma verî nê vajê ke no vera Elewîtîya Reya Haqî hêriş o. Huda Paro dişmenê elewîyan bi çi rîyî şino pîro ma zîyaret keno. Elewîyî riza nêdanê ke Pîr Seyîd Riza wina bêro leminkerdene. Pîr Seyîd Riza û Dêrsim çend nê zîhnîyetê DAÎŞî ra dûrî vinderê hendê pak manenê û rayberê rayîrê xo pawenê.

Nê hîrê heme qewimîyayîşê leyminê ke yew hewte de ameyî ciwîyayene eynî çimeyî ra xo weye kenê. No zî zîhnîyetê qirkerdişê elewîyan o ke temsîlkarê ci îqtîdar o. Kenê ke elewîtîye çîn bikerê. Nê qewimîyayîşî qirkerdişanê ke vizêr Koçgirî, Dêrsim, Sêwas, Mereş, Malatya, Madimak û Gazî de ameyî kerdene, înan ra hêz genê. Dewlete û heme dezgeh û şexsê ke dewlete reyde gurîyene  sey vizêrî ewro zî wazenê elewîtîye biqedînê, coka hêriş kenê.

Deynê milê ma yo ke ma sey FEDA her ca de vera nê sîstemê zilmî vejîyê. Ma do vera heme hêrişê vera elewîyan û elewîtîye vengê xo berz bikerê.''