Federasyonê Elewîyanê Demokratîkan (FEDA) vera xespkerdişê şaredarîyanê Dêrsim û Pulurî eşkerayîya nuştekîye daye û nê vatî:

''Dîktatorîya AKP-MHPyî mekanê Pîr Seyîd Rizayî Dêrsim û Pulur de dest na îradeyê şarî ser. No eynî wextî de destsernayîşê îradeyê elewîyan o. Bi qeyûman vera kurdan, ewlewîyan û heme hetanê azadî û demokrasîyî şer ame îlankerdene. No hêriş eynî wextî de hêrişê vera elewîtîye yo. Xora ma pêro zanê ke îqtîdar wazeno elewîyan na herre de çîn bikero. Nê semedî ra vera elewîyan û bawerîya Raya Heqî hêrişan keno. Ganî ma vera nê hêrişan xover bidê ke ma ameyoxê xo bixelisnê.

Seba ke Pîr Seyîd Rizayî verê nê faşîstan de çok nêda wazenê qesasê nê bigîrê. Hêrsê xo yê vera elewîyan û rayberanê ci ra wina hêriş kenê.Coka ganî heme komelê elewîyan û dezgehê ci vera qeyûmî aktîf tewir bigîrê û wirzê payan ser. Ma rêça Pîr Sultanan û Seyîd Rizayan de têkoşîn bikerê. Têkoşînê mazlûman do miheqêq ser bikewo.''