Rojnameger-nuştoxî Ferda Çetîno ke nêzdîbîyayîşê Ewropa yê vera têgêrayîşê azadîye yê kurdan nêzdî ra teqîb keno ANFyî rê qala nêzdîbîyayîşê nê hêzan kerd.

Ferda Çetînî ard ziwan ke polîtîkaya Ewropa û Amerîka ya serê kurdan têkilîyêka 'neyekser' a. amerîka û welatê Ewropa kurdan û têgêrayîşê sîyasî yê kurdan sey rêxistinêka yewpare nêvînenê. Goreyê ferasetê xo yê îdeolojîk-polîtîkî yewbînan ra cîya vînenê. Amerîka, Îngilîstan, Almanya, Fransa û Swêd bi serran o çarçewa bernameyêkî de xîret kenê ke kurdanê xo awan bikerê. Pênaseyê 'kurdê holî'-'kurdê xirabî' netîceya ecibnayîş û krîteranê nê hêzan o.

Ferda Çetînî îfade kerd ke têkilîya Ewropa ya bi kurdan û têgêrayîşê azadîye yê kurdan ganî têkilîyanê Amerîka ra cîya  nêra ercnayene û vat: ''Almanya dişmenîya xo ya vera PKKyî vurnaye bazarî û goreyê waştişanê Tirkîya têgêrena. Goreyê roşnîranê Almanya 'Dewleta Almanya qedexeyê PKKyî ber ard û semedo ke kurdî wayîrê xeta antî-kapîtalîste Almanya kurdan xo rê sey tehluke vînena. Coka Almanya PKK krîmînalîze kena.' Êyê ke PKK seba sîstemê xo sey tehluke û gef vînenê 'lîsteya terorî' û qedexeyan ferz kenê.''

Ferda Çetînî kişîyayîşê Olof Palmeyî vist vîrî û vat: ''Cînayetê Palmeyî erzîya milê kurdan. Swêdî bi hawayêkê 'serkewteyî' PKK sûcdar kerd. Serran ra dima wexto ke serebût eşkera bi Swêd zaf serê ci de nêvindert. La no cînayet destpêkê qedexekerdişê PKKyî yê Almanya bi. Almanya reyde Fransa û Swêd de ê destbednkerdiş, tepiştişî, vindarnayîşê hesabanê banka û muhakemekerdişê kurdan parçeyê 'Planê Masterî' yê. Almanya tewirê xo yê teda û dişmenîye yê vera kurdan da israr kena. Almanya kurdan rê sûcdarîya terorî û qedexekerdişan ferz kena. Amerîka, Fransa û Swêd kurdan rê polîtîkaya 'kurdan rê heya, PKKyî rê nê' ferz kenê.

Ferda Çetînî bale ante ser ke dinya têkoşînê kurdan ê vera DAÎŞî ra dima eleqeyêkp pîl da kurdan û vat: ''Dinya gerîlayê PKKyî û kurdî şinasnayî, sîstemê Abdullah Ocalanî fam kerd. Dima ke DAÎŞ ame çinkerdene Neteweyanê Yewbîyayeyan (NY), Amerîka, Îngilîstan, Almanya, Fransa û Swêdî plansazîyê neweyî kerdî. Hetêkî ra înan kurdan reyde dîplomasî kerde, hetkarîye daye kurdan la hetêkê bînî ra têkoşînê azadîye yê kurdan û rayberê ci tim kerdî hedef, waşt PKK tasfîye bikerê. Tirkîya û PDK zî tewrê nê planê tasfîye bîyî. La seba ke şarê kurdî no planê tasfîye qebul nêkerd nika zî pê destê partî û îdarekaranê sîyasîyan xîret yeno kerdene ke yewîya kurdan bêra parçekerdene.''

Ferda Çetînî peynîya qiseykerdişê xo de ard ziwan ke Amerîka, Yewîya Ewropa, Sûrîye û Tirkîya destpêkî ra nata hemkarîyêka stratejîke kenê. Amerîka, Rûsya û Yewîya Ewropa îşxalê Tirkîya yê vera Rojawanî tesdîq kerd û paştî daye îşxalî. Çetînî vat: ''Bi nê hawayî înan awankerdişê Herêma Kurdan a Xosere ya Rojawanî asteng kerde.''