Dêrsim de vera qedexeyanê walîtîye yê vera Festîvala Kultur û Xoza ya Munzurî rayraşîyayîş ame kerdene. Wekîlê HDPyî Ayşe Acar Başaran, Alîcan Onlu  û Pêro Dundar zî tede xeylêk kesê ke semedê festîvale ameyî bajar û dêrsimijî Kuçeyê Sanatî ra heta Meydanê Seyîd Rizayî rayra şîyî. Komîteya Amadekarîye ya festîvele da eşnawitene ke rîyê astengkerdişanê Walîtîya Dêrsimî ra festîvale ameye betalkerdene.

Bi nameyê Komîteya Amadekarîye ya Festîvala Munzurî eşkerayîye ameye dayene. Eşkerayîye de ame nê ameyî vatene: ''Programê festîvale goreyê pawitişê ziwan, kultur û bawerîya Dêrsimî amebi amadekerdene. Walîtîye bi bahaneyanê cîya cîyayan vat stadyum û pansîyonî veng nîyê, rayraşîyayîşê vera asîmîlasyon û qirkerdişê xoza û konserê Grup Yorum û Grup Îsyan Ateşî qedexe kerdî. Bi vatişê bînî walîtîye pêro festîvala ma qedexe kerd. Reyna dekewtiş û vejîyayîşê Dêrsimî de bi desan nûqtayê kontrolî ameyî ronayene. Heqê şarî yê seyahatî destê ci ra yeno girewtene. Polîtîkaya zextî yê serranê 90yan Dêrsim de yena caardene. Ne semedî ra ma festîval betal kenê la eslê xo festîvale xora hetê waltîye ra ameye qedexekerdene.''

Vervatoxa Meclîsê Cinîyan ê HDPyî Ayşe Acar Başaran zî bale ante polîtîkaya hêrişkare ya îqtîdarî ser û vat: ''Nêwezanê şarê Dêrsimî wayîrê kultur û xozaya xo vejîyo. Vanê wa şar vera polîtîkaya asîmîlasyonî  wayîrê ercanê xo mevejîyo. Xora no çîyo newe nîyo. Seba ke kurdkî deyîran vanê konserê hunermendan ameyî qedexekerdene. Ewro zî destur nêdanê hunermendî bêrê Dêrsim û nê sey 'têkoşînê vera terorî' name kenê. Ma vînenê kam teror keno. Hema vizêr Zaxo de xeylêk kesî qetil kerdî. Ma vera nê polîtîkayan do bêveng memanê.''