Munaqeşeyanê ke bi vengdayîşê Rayberê MHPyî Devlet Bahçelî dest pêkerd bi vengdayîşê Rayber Apoyî yê 27ê sibate kewtî merhelayêka bîne. La munaqeşe û qesawetê semedê prosesî dewam kenê. Seba adirbirnayîş û prosesê pêvînayîşî yê verênî hetê dewlete ra ameyî sabotekerdene û qirkerdiş û hêrişê girdî ameyî kerdene qesawet zêdîyeno.

 Doç. DR. Fîkret Başkayayo ke bi kitabanê xo yê prosesê netewe-dewelete yê Tirkîya yeno naskerdene proseso newe ANFyî rê erjna.

 Fîkret Başkayayî ard ziwan ke dewlete herinda çareserkerdişê meseleya kurdan de bekaya dewlete ser fikîryena û nê vatî: ''Destgirewtişê mesele û ziwano ke yeno şuxulnayene mojneno ke mesele çarserkerdişê meseleya kurdan ra zafêr bekaya dewleta bimbarek a. Qesawetê sey haştîye, demokrasî, heqê merdiman û refahê şarî yê rejîmê polîtîk îslamî çîn ê. Wazenê Tirkîya bikerê Mîreyîya Îslamî  û tim îqtîdar de bimanê. Rejîmo ke heq hûqûq nas nêkeno, erjano etîkan ra kewto dûrî merdim senî eşkeno paştîya xo pê ci girê bido? Goreyê mi nê rejîmê dişmenê şarî de bazarîye nêbana, gerek vera ci têkoşîn bêro kerdene. Dima ra mesele eşkena bikirîşîyo zemînê çareserîye. Mîyanê xelatîyêka girde de raştîya qije mumkun nîya. Gerek verî rejîm biardîyayêne merhaleyêke bieşko mesele çareser bikero û dima ra masa de biameyêne roniştene.

Eslê xo de mesele Tirkîya ra zafêr bi wesîleya dîzaynê emperyalîstî yê Fîlîstîn, Lubnan û Sûrîye ameye rojdem. Çîyê ke yenê qewimîyayenê çew nêeşkeno sey prosesê haştîye name bikero, gerek şertê haştîye bêrê pêardene. Seba ke çewe bieşko qala prosesê haştîye bikero gerek verî şertê haştîye biamêyene afirnayene. Çareserkerdişê meseleya kurdan têna pîya bi demokratîkbîyayîşê Tirkîya eşkeno aver şiro. Ez bawer nêkana ke famê dewleta bimbareke de nermbîyayîş est o. Qabîlîyetê nermbîyayîşî yê nê rejîmî çîn o. Heta ke bi tarîh û îdeolojîya fermî cehpheyî ra hesabdayîşo radîkal mebo, meseleya seserran mesleya kurdan zî tede qet meseleyêke nîna çareserkerdene . Tirkîya gerek xo bi hewayêkê radîkalî roşeno, xo newe bikero.Rewşa Tirkîya krîz nîya, no halê rijyayîşî yo.''