Wekîlê HEDEPî yê Îstanbulî Celal Firatî modelê tirk-îslamî yê îqtîdarî yo ke warê perwerdeyî de awan keno, ANFyî rê ercna. 

Firatî vist vîrî ke Darbeya 12ê Êlule ra dima dersê dînî yê mecbûrîyî kewtê tedeyîya perwerdeyî. Firatî îfade kerd ke domananê elewîyan rê ferasetê dînî yo yewperest yeno ferzkerdene û vat: ''Ma sey elewîyan bi serran o vera dersa dînî ya mecbûrîye weriştî we. Ma çend dewayî akerdî, qezenç kerdî la îqtîdarê AKPyî birê mehkemeya nêşinasnayî. Bi nê dersanê dînî domanan rê zulm yeno kerdene. Nika kreşan û dibistanan de zî mescîdî yenê akerdene. Bi projeyê ÇEDESî zî dibistanan de îmamî yenê tayînkerdene. Nê kerdişan de armancê îqtîdarî eşkera yê. Vera nînan têkoşînê ma dîyar o. Heta ke şertê perwerdeyê têdûşt, bêpere, zanistî û ziwanê dayîke bêro dayene ma do têkoşînê xo rê dewam bikerê.''

Firatî ard ziwan ke elewîyî çend reyî ameyê qetilkerdene, raştê cîyakerî û asîmîlasyonî bîyê û vat: ''Dewlete yan zî îqtîdarê AKP-MHPyî wazenê bawerîya ma biqedînê. Dewlete bi polîtîkayanê xo kena ke elewîyî pê bikewê. Bi taybetî Serekîya Kulturê Elewîyanê Bektaşîyan û Cemxaneyan projeyo tewr tehlukeyîn o. Elewîyî wazenê ke cemxaneyî sey îbadetxaneyî bi qanûnan bêrê qebulkerdene.''

Firatî da zanayene ke elewîyî bi serran o vera teda û polîtîkayanê asîmîlasyonî xo ver danê û xebatê rêxistinanê elewîyan wina rêz kerdî:

''Rêxistinanê elewîyan seba ke elewîtîye hol bêra famkerdene kampanyayî kerdî.

Rêxistinanê elewîyan seba ke kultur  û bawerîya xo neqlê neslanê bînan bikerê perwerde û aktîvîteyê kulturelî dayî. Armancê nê aktîvîteyan no bi ke domanê elewîyî wayîrê mîrasê xo yê kulturelî vejîyê. 

Rêxistinê elewîyan vera cîyakerîye û sûcanê kîn-nefretî têkoşîn kenê. 

Rêxistinanê elewîyan bi armancê protestokerdişê polîtîkayanê hukmatî çalakîyê bêîtaetî yê sivîlî kerdî.

Rêxistinê elewîyan tewrê prosesanê huqûqî yê serê elewîyan bîyî û bi rayîrê huqûqî kewtî xîretê pawitişê heqê xo.

Rêxistinanê elewîyan tewr peyên vera Serekîya Kulturê Elewîyanê Bektaşîyan û Cemxaneyan dest pê têkoşînî kerd.''