Wekîlê DEM Partî yê Îstanbulî Celal Firatî ANFyî rê qisey kerd.

Firatî da zanayene ke pêvînayîşanê bi Rayber Apoyî hêvîyêka pîle afernaya û vat: ''Ganî hinî na meseleya kurdan bi demokrasîyî bêra çareserkerdene. Çareserîyêka haştîyane lazim a. Tesbîtê Birêz Ocalanî yê serê meseleya kurdan meseleyê Tirkîya û Rojhelatê Mîyanênî zaf girîng ê.

Firatî bale ante nakokîyanê polîtîkayanê zere û teberî yê Tirkkîya ser û vat: ''Hetêkî ra seba çareserîye ê veng danê la hetê bînî ra sivîlan danê bombayan ver. Şima qalê wayûbiratîye kenê la hetê bînî ra hêrişê şarî kenê. No nêno qebulkerdene. Qetilkerdişê sivîlan bi hêrişanê hewayî, bombardumanê vera awbendan nênê qebulkerdene. Bera nê hêrişan ganî ma vengê xo brz bikerê.''

Firatî vist vîrî ke Sûrîye de  vera elewîyan hêrişî yenê kerdene û vera ney nêrazîbîyayîşê xo mojna. Firatî vat: ''Elewîyî yenê qirkerdene. Cenazaya akademîsyenêke zanîngeh de dîyena. Ganî çew verê na barbarîye de bêveng nêmano. Elewîyê Sûrîye tarîxî ra nata uca de yê. La nêeşkayê yewîya xo bîyarê ca. Tirkîya de zî meseleyêka winayêne est a. Ganî vera nê cîyakerî û qirkerdişanê etnîkan û dînîyan têkoşîno hempar bêro kerdene.''

Wekîlê DEM Partî Firatî îfade kerd ke bawerîya sîyasetê kurdan haştî û demokrasîyî ser o tam a û seba çareserîye zî ê do bi qerardarî têkoşîn bikerê. Firatî vat: ''No têkoşîn tena seba kurdan ney seba caardişê vîzyonêkê haştîye yê pêro herême yo.''