Prosesê Komployê Mîyanneteweyî yê vera Rayberê Şarê Kurdî Abdullah Ocalanî de xeylêk cînayetê tarî ameyî kerdene. Şêwirmenda Serekdewletê Rûsya Galina Starowojo zî verê keyeyê xo de kişîyaye ke seba Rayberê Şarê Kurdî Abdullah Ocalanî statuyo sîyasî waştêne. 21ê teşrîna peyêne ya 1998î de zî Wezîro Verên ê Îranî Daryuş Forouhar û cinîya ci Pervanehe kişîyayî.

Goreyê medyaya tirkan Daryuş Forouhar û cinîya ci Pervanehe hetê MÎTî ra kişîyayî. BBCyî zî 2004 de heman raştîye îdîa kerde. Daryuş Forouharî dima ke Humeynîyî şorişê Îslamî kerd 1980an de wezîrîye ra îstîfa kerdbi. 21ê teşrîna peyêne ya 1998î de tay merdiman Wezîro Verên ê Îranî Daryuş Forouhar û cinîya ci Pervanehe keyeyê înan da bi hawayêkê barbarî kiştî. Dewaya nê qirkerdişî bênetîce qedîyaye.

Kênaya Perwanehe-Daryûş Forouharî Parastou Forouhar derheqê dostanîya babîyê ci û Abdullah Ocalanî de ANFyî rê qisey kerd.

Parastou Forouhar da zanayene ke babîyê ci dostê Dr. Qasimlo, Barzanî û Talabanîyî zî bi û seba heqanê kurdan tim têkoşîn kerdêne. Parastou Forouhar pare kerd ke dima ke Rayberê Şarê Kurdî 12ê teşrîna peyêne ya 1998î de şi Roma babîyê ci pê hesîya ke Îtalya Abdullah Ocalan do teslîmê Tirkîya bikera.

Parastou Forouhar vat: ''Babîyê mi cade waşt seba ey çîyêk bikero û eşkerayîye daye çapemenîye. Babîyê mi Îtalya ra waşt ke wa Ocalan teslîmê Tirkîya nêkera û heqê multecîtîye bida ci. Reyna babîyê mi tewrê nawnayîş û kampanyayanê vera teslîmkerdişê Ocalanî bi. Babîyê mi o çax xîret kerd ke sefîrê Îtalya yê Tehranî de seba Ocalanî têkilîye virazo.

Seke ez zanena cînayetî ra hewteyêkî verî babîyê mi pê telefonî Abdullah Ocalanî reyde qisey kerd. Nê pêvînayîşî de ciwanêkê kurdî tercumanîye kerde. Semedê pêvînayîşî embazê ci yê kurdî zî ameybî keyeyê ma. Goreyê cigêrayîşanê mi cînayetî ra verî babîyê mi çend rojan telefon de qisey kerd. Dima ke babîyê mi merd nê çîyî zaf balê mi antî.''

Parastou Forouhar pare kerd ke a qetî nêzanena înan telefon de çita ser qisey kerdo û vat: ''Ez vana babîyê mi tira persa ke wazeno se bikero. Înan çarçewa babeta teslîmkerdişî de qisey kerd.''

Parastou Forouhar eşkera kerd ke babîyê ci tim bi hawayêkê aktîfî paştî dayêne kurdanê Vakur, Başûr û Rojhelatî û vat: ''Ez se ra se pê bawer nîya ke babîyê mi çi semedî ra kişîyayo. Xora o çax vera muxalîfanê Îranî sûîkastê pîlî estbî. La qet yew bire hende lez nêameye caardene. Kiştoxan fikrê babîyê mi zanayêne. Dima ke babîyê mi kişîya îstîxbaratanê Îran û Tirkîya pîya 'perwerdeyê komandoyî' girewt. Tay kiştoxî zî o çax ameyî berdene bi Tirkîya ke nêrê muhakemekerdene. 18 kesan eştbî keyeyê ma ser. Yanî o cînayet cînayetêko plankerde bi.''

Parastou Forouhar da zanayene ke babîyê ci tay kurdkî zanayêne û embazo nêzdî yê Dr. Qasimlo, Îdrîs Barzanî û Mala Mistefa Barzanîyî bi. Parastou Forouhar vat: ''Babîyê mi mabênê Îranî û Dr. Qasimloyî de mabênçîtîye kerdêne. Dr. Qasimlo û Şêx Îzeddîn Huseynî dostê ci bîyî. Wexto ke têgêrayîşanê kurdan vejîyabî koyan ser Şêx Îzeddîn Huseyîn û Celal Talabanîyî serekwezîrê ê çaxî Mehdî Bazerganî ê mektubêke erşawite û înan waşt ke wa babîyê mi mabênçîtîye bikerê. Babîyê mi waştêne wa şer vindero û rayîrê dîyalogan abibo. La xîretê ey ser nêkewtî û şer newe ra bi giranêr. ''

***

Eşkerayîya ke Daryuş Forouharî 20ê teşrîna peyêne ya 1998î de sey serekê Partîya Mîletî ya Îranî seba Rayberê Şarê Kurdî Abdullah Ocalanî daye wina bîye:

''Hemwelatîyê ercîyayeyî,

Têgêrayîşo ke bi rayberîya Serekê PKKyî Abdullah Ocalanî seba neteweya kurdan 14 serrî verî ronîya vera îşxalkeran têkoşînêko pîl da destpêkerdene. Ganî ma xo vîr a nêkerê ke neteweya kurdan neteweya tewr kahane ya Îranî ya. Tedaya sîyasî û leşkerî ya tirkan ra nê di menganê peyênan de Ocalan neçare mend ke cayê xo ra vejîyo û 12ê teşrîna peyêne ya 1998î de şîyo paytextê Îtalya Roma.

Ocalan raybero çêr o û çend reyî mergî reyde têrî mendo. O nê têkoşînî de qet nêvindert. Îtalya rixmo ke welatêko averwaz a Ocalan uca de teslîmkerdişî reyde têrî mend. Îtalya dima eşkera kerd ke ê do Ocalan teslîm nêkerê. La reyna zî na tedaya vera Ocalanî ma qehirnena. Semedo ke mehkemeya Îtalya Ocalan vera da ma sey pawitoxanê heqanê merdiman zaf şa bîyî. Seba na bire ma mehkeme ra û seba têkoşînê înan kurdan ra sipas kenê.''