Taxa Çulî ya qezaya Rêzanî ya Amedî de 21ê tebaxe de Narîne Guran vinî bibî û 8ê êlule de meyîtê aye dîyabi. Derheqê kişîyayîşê Narîna 8 serre de têkilîya keyeyê aye yê bi dewlete rojdem bibî. Amebi îdîakerdene ke Çulî de keyeyê Guranan de depoyêkê cebilxaneyî est o.

Dewaya vera kişîyayîşê Narîne dewam kena. Hetê bînî ra bi fotografan ame îsbatkerdene ke keyeyê Guranan de depoyê cebilxaneyî est o. Fotografan de aseno ke cebilxane de tewr tay 400 kalaşnîkofê AK-47î est ê û seba ke 'çekî zerar nêvînê' ameyê pêştene.