Bager (Ridvan) Sayako  çewligij bi pîlkerdişê serranê ci amebi tepiştene. Sayak nika Zîndanê Sîncanî de yo. Dayîka Sayakî Wesîle Sayak da zanayene ke lajê ci telefon de vato fotografê keyeyî ke înan şawitê zafê înan sey ''tehlukeyin'' ameyî vînayene û nêdîyayî ci.

Dayîke Wesîle Sayak vat: ''Mi lajê xo rê fotografê şarê keyeyî sey babî, pîrike û pîrikî şawitî îdareyê zîndanî nê fotografî nêdayê ci. Lajê mi bi serran o hucreyê yewkesan de yeno tepiştene, kitabê ci ameyî destsernayene. Fotografan nêdanê ci. Ez Çewlîg de ciwîyena û çar serrî yo mi lajê xo nêdîyo. Ez 60 serrî ya têna ciwîyena.  Lajê mi mi ra girewt kerd zindan. Binê tecrîdî de tepişnenê, nêverdenê şiro cayê embazanê xo. Dageranê ke ceza daye lajê mi cipersayîşê cemaatî ra ameyî tepiştene. Nê dadgeran bîlaheq serrê lajê mi kerdî pîl û tepişt.  Ez edalet wazena. Qetilkar û tecawuzkarî ameyî veradayene la lajê min o ke 17 serre bîlaheq ame tepiştene vera nêdîyeno.''

Ridvan Sayak 20ê temmuza 2010 de bi îdîaya verê banê AKPyî yê Erziromî de bomba naya ro ame tepiştene. Sayak o wext 17 serre bi. Sayako ke 2ê kanûna 2011î de Mehkemeya Cezaya Girane ya 4. ya Erziromî de vejîya verê dadgerî waşt kurdkî qisey bikero la dagerî waştişê ci red kerd û cezaya muebedê giranî daye ci. Ceza 9ê adara 2012yî de hetê Mehkemeya Berze ra ameye tesdîqkerdene.

Mehkeme verê qerarî serrê Sayakî 4 serrî pîl kerdî.Tarîxê bîyayîşê ci yê 25ê tebexa 1992yî sey 25ê tebexa 1988î ame bedilnayene. Roje û menge nê têna tarîxê serre ame bedilnayene. No bi belgeyanê ke dosya Sayakî de ca girewtene  ame îspatkerdene zî. Dadgeranê ke cezaya muebedî daye Sayakî badê cedhkerdişê darbe çarçewa cipersayîşê cemaatî de ameyî tepiştene. Sayak zî par Zîndanê Kirikkale ra surgunê Zîndanî Sîncani bi û binê tecrîdî yeno tepiştene.