Artêşa tirke ya îşxalkere 17ê nîsana 2022yî de vera Zap û Avaşînî hêrişê neweyî dabî destpêkerdene. Artêşa tirke ya ke nêeşkena erdî ra aver şora, bi giranî Teyarayanê Bêmerdiman ê Çekdaran xebitnena.

Wezîrîya Pawitişî ya Tirkîya çend rojî verî pare kerd ke ê hêrişan de fuzeyê MAM-Lyî şuxilnenê. Keyepelêkê înternetî de zaf wasfê nê fuzeyan yeno dayene. La gelo nê fuzeyî senî kewenê destê dewleta tirke?

Nê fuzeyî seke dokumento eşkera yê hemkarîya almanya û dewleta tirke yê. Her çiqas artêşa tirke îdîa bikera ke MAM-L hetê şîrketa Roketsanî ra virazîyenê zî bi destûrê Almanya hetê fîrmaya çekan a almanan TDW ra şîrketa keyeyê Erdoganî Bayraktar nê fuzeyan virazena.

Nê fuzeyî Lîbya, Yemen, Armenîstan û Etîyopya de bîyî sebebê mergê bi desan sivîlan coka tira 'fuzeyê kiştoxî' vajîyenê. Fîrmaya ke nê fuzeyan virazena û heqê lîsansî dayo Roketsanî, fîrmaya çekan a almanan TDW yo. TDW 2010 ra nata babeta fuzeyan de hemkarîya bi dewleta tirke keno. Seba fuzeyanê LRAT û MRAT ê ke 2018 ra nata destê dewleta tirke de yê, TDW aparat roşeno.

Dima ke dewleta tirke 2020 de hêrişê Rojawanî kerdbi eşkera bibi ke dewleta tirke lîsansê MAM-L hêrînayo.

Serra 2020î de şerê mabênê Armenîstan û Azerbaycanî de teyarayê bêmerdiman ê Tirkîya zaf kewtbî rojdem.

Goreyê agahîyan fîrmaya TDW ra ber şîrketa Aerospatîale ASByî ya Fransa zî berardişê MAM-Lyî kena. Ame vatene ke batarîyê MAM-Lyî hetê Fransa ra virazîyayê û serê ci de kodê NATOyî est ê.